He koura te tae o ngā metara kua whakahokia mai e ngā kaihoe waka ama o Aotearoa mai i te Taumāhekeheke Waka Ama o te Ao 2008 i te moana o Latoma i Sacramento, Amerika.

Toru tekau katoa te maha o ngā metara i riro i a Aotearoa, e iwa ngā metara koura, tekau ngā metara hiriwa, tekau mā tahi ngā metara paraihe.

Hei tā Maggie Greening o Ngā Kaihoe o Aotearoa, he mïharo ngā kaihoe me ā rātou whakataetae i runga i te moana o Latoma.

“Tino harikoa ahau ki ngā pukenga hoe i kitea e te ao.”

E rua rau mā waru ngā kaihoe kei ngā kapa waka ama kotahi rau ono tekau mā toru i haere ki Sacramento hei kanohi mō Aotearoa ki te taumāhekeheke nei.

He rahi ake i te kotahi mano whā rau ngā kaihoe katoa i whakataetae ki ngā reihi e rima rau mita te roa, kotahi mano mita rānei te roa, i ngā waka ama takitahi, takiono, ngahuru mā rua hoki.

Hei te tau rua mano tekau ka pakanga anō ngā whenua mō ngā hōnore waka ama nui ki Niu Karaponia.