Ahakoa tō pakeke ka taea e koe te whakatinana i ou wawata pakihi.

Koinā te mahi a Huria Tawa o Ngāti Paoa whitu tekau mā rua tau tana pakeke.

Rahi ake i te rima tekau tau tēnei kuia e mahi ana ki te ao mātauranga mai te kura mahita ki Te Tāhūhū o te Mātauranga.

Ināianei kua aro atu ia ki ngā mahi pakihi hokohoko toi Māori.

I te marama o Hōngongoi i whakatūwheratia e ia tana toa hokohoko toi Māori ki Tauranga Moana e kiia nei ko Toi Ataata.

I tono atu a Huria ki Te Ratonga Pakihi a Te Puni Kōkiri ki te awhi kia pūāwai ai tōna moemoea pakihi. Ko te maherehere makete, te rautaki utu me te whakawhanaungatanga ki ngā tohunga tāke, kaute ētahi o ngā mahi a Te Puni Kōkiri ki te awhi i a ia.

Hei tā Huria, he rawe te tautoko a Te Puni Kōkiri ki te awhi i tana pakihi.

I pūpū ake te koingo ki roto i a Huria ki te whakahaere he toa i te wā i haere ia ki ngā karaehe whakaako raranga.

“He pai te mahi raranga ki ahau na reira e tika ana kia mahi ahau i tētahi mahi arohanui ki a au,” hei tāna anō.

Nā wai rā ka hiahia a Huria ki te whakatū hoki he karaehe raranga ki tana toa.