Ia tau, ia tau ka hinga atu he hoia morehu nō Te Rōpū Rua Tekau mā Waru.

Koinā te take i whakatauria ai i Ōmāpere i tērā tau kia huihui ai ia tau na te mate haere o ngā hoia.

I tēnei tau karapinepine atu ngā morehu toru tekau mā waru ki Te Hokowhitu Marae i Whakatāne. Rahi ake i te whā rau tāngata i tae ake.

Hei tā Paora Kruger Perehitini o Te Rōpū Rua Tekau mā Waru, ko te whakawhanaungatanga te kaupapa nui o ngā huihuinga nei i te wā aranga.

Hei tāna anō ko tētehi o ngā haere motuhake i tēnei tau, ko te pōwhiri a Tūhoe ki ngā hoia morehu me ā rātou whānau i tō rātou ahurei.

Ko Parekura Horomia te Minita mō ngā Take Māori tētehi i tae ake ki te whakanui i te kaupapa.

Hei tāna, he tohu nui whakaharahara te taenga mai o te tama tuarua o te kuini, arā, Te Tiuka o York a Pirinihi Andrew i Rotorua ki te whakanui i a Haane Manahi.

Hei tāna anō, he whakamaharatanga te haerenga mai o te pirinihi ki te whakanui i te māia o te hoia Māori.

Tekau mā whitu ngā hoia morehu i hinga atu mai te huihuinga i Ōmāpere.

A te wā aranga o te tau e tū mai nei ka huihui anō ngā hoia morehu ki Tūranganui ā Kiwa.