134 ngā tau a tini me mano e karapinepine atu rā ki te Pā o Rātana ki te whakanui i te rā whānau o te poropiti a Tahupōtiki Wiremu Rātana.

Koinei te haere tuatahi a Te Arikinui Tuheitia hei kīngi Māori ki Rātana. He waewae tapu hoki te Kāwana Tianara hou a Anand Satyanand.

Ia tau, ia tau hoki atu ai ērā atu o ngā mana nui ki Rātana, pērā i Te Arikinui o Tūwharetoa a Tumu te Heuheu, te Tumuaki o te Rōpū Reipa a Helen Clark me te kāhui minita o te Kāwanatanga.

Engari anō hoki ko ngā tini mōrehu ka whakakotahi mai, ka whakawhāiti mai, ka whakakao mai. Kotahi tonu te kaupapa, ko te whakanui i te pāpā o tō rātou hāhi mā roto mai i te karakia, te hākinakina, te whakangahau, te wānanga, me te whakawhanaungatanga.