Kōkiri 16 – Haere Rā e Tā

Published in Kōkiri 16, Mahuru - Whiringa ā Nuku 2009

“I hiku kau anō te putanga mai o te tangata ki tēnei ao, ā, ka hoki atu anō ki te taha i hangaia mai ai.”

I te rua tekau mā whā o Mahuru ka mate nei a Tā Howard Morrison, e whitu tekau mā iwa tau te pakeke. Ka roa nei a ia e mate manawa ana. I te pō poroporoaki rahi ake i te rua mano tāngata ka whakarauika atu ki te marae o Te Papaiōuru i Ōhinemutu ki te whai wāhi i te kōnohete whakanui i a Tā Howard.

He tini ngā kaiwhakangahau rongonui o te ao i whakangahau i te whakaminenga pērā i a Kahurangi Malvina Major, The Ladykillers, Nesian Mystik, Ardijah, Frankie Stevens me te maha noa atu. Ka mutu te kōnohete poroporoaki i te weherua pō kia whakangā ai te whānau mō te rā nehu nui.

I te takiritanga o te ata o te rā nehu ka rere ngā karakia, ka hīpokitia e te whānau Morrison te kawhena a Tā Howard ki te korowai.

Tīraha kau ana te hautupua rongonui nei ki te mahau o tōna tupuna whare a Tamatekapua.

Ka pōwhiritia te rōpū whakamutunga ki te marae kātahi ka tīmata ngā whakaritenga whakamutunga mō te tangihanga.

Nā Pīhopa Ngarahu Katene ngā mihi i tātaki, ā, ka kīnakitia ki te waiata whakatūwhera a Rewa Ututaonga nō Te Arawa.

Ka rere ko ngā karakia me ngā waiata, ka heke te hūpē me te roimata, ka tōiri te katakata me te kōrero.

Hei tā Donna Grant, te tamāhine a Tā Howard, “mōhio tonu mātou ki te hiahia o tōku pāpā kia whakapāhotia tōna tangihanga ki te motu, i runga i te arohanui o te motu ki a ia.”

Hei tāna anō, “he uaua tōku pāpā engari koa he hūmarie.” Nā te Pirimia tuarua a Bill English te mihi nui mō Aotearoa whānui ki te kiri mate.

Ka mutu ngā whakaritenga, ka kawea te tūpāpaku ki te Whare Karakia o St Faiths mō ngā karakia whakamutunga.

Ko te hīkoi whakamutunga mō te tupapaku o Tā Howard Morrison ka haere ki waenganui i te tāone o Rotorua. Ka tau atu ki te urupā o Kauae kei te take o Ngongotahā.

Nō te 29 o Mahuru ka whakahokia a Tā Howard Morrison ki te rua kōiwi o ōna mātua tūpuna.

Kua mahue iho te pouwaru a Kahurangi Kuia Morrison, ngā tamariki tokotoru, arā, a Donna Grant, Richard Morrison me Howard Morrison Junior.

Back to top