E whakahau ana a Hannah Wallace, ko te Ahuwhenua Kaipāmu Rangatahi Māori o te Tau 2015, i ngā kaipāmu rangatahi katoa ki te uru atu ki te whakataetae o 2016.
Published: Rāhina, 09 Whiringa ā-rangi, 2015 | Monday, 9 November 2015
Ko Hannah te wahine tuatahi hoki ki te whiwhi i te tohu. Ka kī ia kua ihi katoa ia i ngā mea angitu kua hua mai i te whakataetae. He māngai a Hannah ināianei mō ngā kaipāmu Māori rangatahi.
“He mea panoni oranga tēnei, ā, ka whai kaha koe kia angitu,” tā Hannah kī. “Ka mīharo katoa au i ngā mea angitu i puta māku – te kauhau ki ngā hui maha, ngā tāpaetanga mahi, me te tūtaki ki ngā tāngata mana nui!”
“Tae noa mai ki tēnei wā he haerenga whakamīharo tēnei. Ko ngā tāngata kua tūtaki atu au, ko ngā wāhi kua tae atu au, kāore au i whai whakaaro ka pēnei aku mahi, he mea kaiora.”
Nā te toa i tēnei whakataetae kua māia au ki te whai i te whakatutukinga o ōku wawata ki te pupuri, ki te rīhi rānei i tōku ake pāmu. Nā tēnei i manawanui ai au, me taku mārama hoki, āe, ka taea e mātou te hunga wāhine te mahi hei kaipāmu, ā, āe, he pai hoki mātou ki te mahi nā te mea kei runga noa atu mātou pērā i ngā taitama,” te whakamārama a Hannah.
“Arā te tokomaha tāngata e hiahia ana ki te āwhina i a mātou te hunga rangatahi ki te whakatutuki i ō mātou wawata. Mahia atu, nā te mea he wheako whakamīharo e kore e wareware i a koe!” te kī a Hannah. “Kei runga noa atu te whakawhiwhinga nā te mea ko au te wahine tuatahi i toa; he hōnore mōku kia tū hei kanohi mō tēnei tohu.”
Ka tuku pūtea taunaki a Te Puni Kōkiri, Te Tumu Paeroa, Primary ITO, me Allflex.
E ai ki a Mary McCulloch, ko te Kaiwhakahaere Pūkenga, Ako, Mātauranga hoki ki Te Puni Kōkiri, ko te uru i te whakataetae tētahi mea angitu mā ngā kaipāmu Māori hou kei tētahi pāmu ahuwhenua miraka kau e mahi ana kē.
“Mehemea kua oti i a koe, e mahi ana rānei koe i te pōkaitahi ā-motu o te Ahuwhenua Taumata 3, teitei atu rānei – māu tēnei whakataetae,” tā Mary.
“Ka riro i ngā kaitono te urupare tautoko mai i tētahi rōpū kaiwhakawā whai wheako. He mea angitu hoki te whakataetae hei waihanga tuakiri i roto i te rāngai pakihi ahuwhenua Māori, hei whakatū hononga ki ngā hinonga ahumahi ka tautoko pea i tō ara umanga. Ka tūtaki hoki koe i ētahi anō kaipāmu, ka whakatupu hononga puta noa i te motu.”
Atu i te paraihe moni, ka riro i tēnā, i tēnā kaitono whiringa toa te karahipi whakangungu $1,500 te rahi hei āwhina i ō rātou whanaketanga ngaio.
Ka tuwhera ki ngā tono tae atu ki te 29 0 Huitanguru 2016. Kia uru, kia whiwhi pārongo anō rānei, titiro ki http://www.ahuwhenuatrophy.maori.nz/young.php