Toi Kikī 2016

Published on Rāmere, 22 Kohitātea, 2016

Mō ngā wiki e toru, i ia rua tau, ka tū Te Taurima o Aotearoa (New Zealand Arts Festival) ki Pōneke. Koia nei tētahi o ngā taiopenga toi whakahirahira o te motu, e kitea ai ngā momo mahinga toi nō Aotearoa me rāwāhi.

I te tau 2016, ka huri te tau 30 mai i te whakatūnga o te hui, hei tā te Tumu Whakahaere, hei tā Sue Paterson ONZM, “Kua tau te noho o ngā toi me ngā tikanga Māori ki Te Taurima o Aotearoa. Ka pōwhiritia ngā kaimahi toi me ngā kaimātakitaki nō te ao whānui hei te atatū o te rā tuatahi o te hui. Ko ētahi o ngā tino whakaaturanga i te hōtaka toi ko te Modern Māori Quartet, ko Not in our Neighbourhood me Page Turners.

Ka kitea hoki ngā mahi a Dylan Lardeli, rātou ko George Henare, ko George Nuku, ko Bob Jahnke, ko Kelcy Taratoa, ko Horomona Horo, ko Keremea Taepa, ko Maaka Pepene. Ka tū te whakaaturanga motuhake o te kaupapa ki Westpac Stadium, arā, ko te Royal Military Edinburgh Tattoo tērā. Ka tū ngā mema o ngā kapa haka matua o te motu mai i Te Matatini rātou ko tētahi rōpū nō Pōneke ki taua whakaaturanga. Nui atu i te 200 rātou.”

Anei ētahi o ngā whakaaturanga e minatia ana e ngā kaimahi o Kōkiritia. Mō ngā whakamahuki katoa mō ngā whakaaturanga nei tirohia New Zealand Festival.

Chocolate Box Delux

Ko Vanessa Stacey, rātou ko Lisa Tomlins, ko Ayesh Kee o Chocolate Box Delux. Nā NZ Festival/Sarah Hunter tēnei whakaahua.

Ka whakakapia te whakaaturanga o Le Grand Continental e te rōpū o Chocolate Box Delux i te pō tuatahi o tēnei taiopenga. He whakaaturanga kanikani tēnei nā Sylvain Emard, he kaitohutohu kanikani nō Wīwī me Kānata. He kaitūao ngā kaikanikani katoa nō te rohe o Te Whanganui-a-Tara.

Ngā mihi ki a: Carl Bland (kaihoahoa) rāua ko John McDermott (kaiwhakaahua).

Te Pō 

 

He whakaaturanga whakakatakata te kaupapa o Te Pō. Wahapū ana te rere o ngā kōrero hei whakaohooho, hei whakakatakata anō i te tangata me ngā waiata ngahau a ngā pēne Māori. He kōrero mō te tangata e rapu ana i tōna hoa pūmau me tō rāua tutakinga anō.

Ko ngā kiripuaki, he pirihimana me tētahi tangata kāpō e kimi ana i a Bruce Mason he kaituhituhi whakaari – heoi, he aha oti te kōrero a te karoro i te matapihi?

Page Turners

Tokorima ngā kaimārehe rongonui o Pōneke e whakataki ana i ā rātou kōrero mai i tētahi puka whakapakoko, e toru mita te teitei. Ko ngā kaiwhakataki ko Te Rauparaha, rātou ko Robin Hyde, ko Nancy Wake, ko James K Baxter, ko Carmen Rupe.

 

Nō Grant Stevenson te whakaaro mō Page Turners, otirā, he mea ārahi tēnei kaupapa nā Jim Moriarty. Ko te atamira, ko tētahi o ngā puka whakapakoko rahi rawa atu o te ao. Ka huri ngā whārangi, ka puta mai tētahi wāhi rerekē nō te ao o tētahi o ngā kiripuaki, arā, ko te Whanga o Pōneke i te rautau 19, ko te Wharekai Whakahirahira o Carmen rānei.  

Ka kitea ngā ringa rehe o te ao tuhituhi i te Writers Week e tū ana i te wā o tēnei huihuinga. Ko ētahi o ngā uhumanea o te wā ko Aroha Harris, he mema o Te Rōpū Whakamana i te Tiriti o Waitangi, he tumu hītori me te kaituhi. Ko tētahi anō ko Witi Ihimaera, he kaituhi pūoro, whakaari, kiriata me te kaituhi pukapuka. Mā rāua me te rangapū kaituhi tātou e whakaako, e whakaawe, e whakangahau i te Writers Week 2016.

Ka tū ngā whakaaturanga o ngā toi ataata a George Nuku, a Bob Jahnke, a Kelcy Taratoa ki Pātaka Art + Museum ki Porirua, i raro anō i te kaupapa o Te Taurima o Aotearoa.

 

 

 

[Read more]

Back to top