Ko te whakatuwheratanga o tētahi papakāinga hou ki Heretaunga te whakatinanatanga o te wawata nui o ngā reanga maha o tētahi whānau te kī a te Manahautū Tuarua o Te Puni Hononga ā-Rohe, a Di Grennell.
Published: Rāmere, 01 Pipiri, 2018 | Friday, 1 June 2018
E toru ngā whare kua whakatūria ki te papakāinga i Heretaunga. E toru ngā moenga o tētahi whare, e whā ngā moenga o ngā whare e rua. He whare haumaru, he mahana, he māmā hoki te rēti mā te whānau Tawhai. E 70 tau rātou e noho ana ki tēnei whenua.
"He haerenga roa tēnei mā te whānau. I tēnei rā, kua tutuki ngā wawata o ō rātou mātua i te whakatūnga o tēnei kaupapa hei taonga tuku iho ki ngā reanga whai muri mai, arā, nui atu i te 100 ngā mokopuna," te kī a Ms Grennell.
Kei te koa katoa a Ms Grennell i te whakatutukinga o tēnei papakāinga, otirā, kei te piki haere te nui o ngā whare kua whakatūria e Te Puni Kōkiri mā ngā whānau Māori huri noa i te motu.
"Kei te rangona te whakaaro nui o te whānau ki te hauora o ngā mokopuna me ngā uri whakaheke i roto i tā rātou kupu ārahi, arā, 'manaaki whenua, manaaki tangata, haere whakamua - mā te whenua ka ora te whānau'.
"Kua takatū rātou mō ngā rā o āpōpō i te whakatūnga o ngā whare rēti māmā i runga i tō rātou ake whenua. Kātahi te kaupapa ātaahua ko tēnei."
"Kei te mihi au ki te katoa i tō rātou kaha me tō rātou manawanui ki te kaupapa. Nō mātou te māringanui ki te tautoko i a koutou."
E $457,603 te nui o te pūtea i tukuna e Te Puni Kōkiri Māori Housing Network ki te whakatūnga o te papakāinga. Nā Te Puni Kōkiri anō te $69,000 hei utu i tētahi kaupapa whaihuanga e pā ana ki te papakāinga.
Mō ētahi atu pārongo mō te Māori Housing Network haere ki www.tpk.govt.nz<http://www.tpk.govt.nz
Kaimahi pāpāho:
Nicky Birch
Tumu Whakahaere, Puni Pāpāho
027 762 7293 bircn@tpk.govt.nz