Tau kē!

Published on Rāhina, 18 Kohitātea, 2016

Nō Te Ātihaunui-a-Pāpārangi a Chelsea Bayly. E 26 tau tōna pakeke, otirā, ko ia tētahi o ngā wāhine ruarua kua whakawhiwhia ki tētahi tūranga mahi tūturu ki tāna wāhi mahi. Ko te nuinga o ōna hoamahi he tāne, kē.

Ka 22 ngā tau a Chelsea, ka tīmata mai ia hei kaimahi “kōhikohiko”. Ināianei, ko ia tonu te Kaiwhakahaere o te Taha Whakanao ki AWF Labour Recruitment i Whanganui.

Kua puta ia i te kura tauira Māori, kua whiwhi hoki a ia i tētahi tohu whakahaere pakihi. Hei tāna, ”tau kē” ngā akoranga i mau i a ia i te hōtaka nei.

“E kore e wareware i a au ngā ākonga mai i tēnei hōtaka me ngā momo mātauranga i tau mai ki runga i a mātou.”

I whai a Chelsea i tāna tohu i raro i te kaupapa o te Kura Tauira Māori o Te Mana o Whakaaro. He kaupapa tēnei e whakahaerehia ana e Te Puni Kōkiri me te uepū kimi kaimahi o AWF Madison. Ko tā te hōtaka nei, he hāpai ake i te pitomata o ngā tauira Māori kia whai rātou i ngā tohu mahi, kia eke hoki rātou ki ngā taumata whakahaere i te ao mahi.

Ka kitea ngā pūkenga whakahaere a Chelsea, kātahi ka tonoa ia e te tari AWF o Whanganui ki te kuhu atu ki tēnei hōtaka.

“He kaimahi noa ia i taua wā – heoi, he kaha nōna ki te haere mai ki te mahi i ia rangi, ka tae mai hoki i te wā e tika ana. I tino eke a Chelsea i te wā i tukuna a ia ki te whai i tētahi o āna raihana taraiwa,” te kī a Alex Hapuku, he Kaiwhakahaere ā-Rohe o AWF.

Ahakoa ko te nuinga o ōna hoamahi he tāne, he pūkenga anō ō Chelsea hei tāpae ki te rāngai ringa raupā.

“Auau ana tō rātou whakatoi mai ki a au, heoi anō, he ngau pai tō tēnei kurī.”

Ki tā te Kaiwhakahaere Matua o AWF Madison, ki tā Simon Bennett, “Me mihi ngā mahi me te manawanui o ngā tauira katoa. Kāore e kore, ka kitea ngā hua i roto i ā rātou wāhi mahi i ngā tau e tū mai nei.”

Ko tā Chelsea mahi ināianei, he kimi kaimahi mō Mars Petcare. Ka pai ki a ia tana tūranga mahi ki AWF.

“E mārama ana ki a au, he mea nui tonu te kimi ake me te whai i ngā huarahi ako i te mahi.”

 

Back to top