I tēnei rangi, kua hainatia e Te Puni Kōkiri, e Te Māngai Pāho me Te Taura Whiri i te Reo Māori tētahi whakaaetanga e whakarewa ana i ētahi kaupapa reo Māori e aro nui ana ki te hunga rangatahi.
Published: Rāpare, 16 Haratua, 2019 | Thursday, 16 May 2019
I tēnei rangi, kua hainatia e Te Puni Kōkiri, e Te Māngai Pāho me Te Taura Whiri i te Reo Māori tētahi whakaaetanga e whakarewa ana i ētahi kaupapa reo Māori e aro nui ana ki te hunga rangatahi.
Kei roto i te whakaahua ko ngā toihautū o ia manatū e haina ana i te whakaaetanga, arā ko Larry Parr, ko Michelle Hippolite, rātou ko Ngahiwi Apanui.
Ko ngā kaupapa reo Māori; ko ētahi akoranga poto, ko ngā papamahi mā te hunga rangatahi, ko tētahi hui taumata ā-motu mō te reo Māori me tētahi kaupapa pae pāpāho pāpori. Ko te whāinga nui o ngā kaupapa katoa, he akiaki i ngā rangatahi ki te hāpai i te reo Māori i ngā mahi o ia rā.
"Koa katoa au i te pānuitanga o ngā kaupapa reo tuatahi o Maihi Karauna mā te hunga rangatahi. Kei ō rātou ringaringa tonu te reo Māori o āpōpō." te kī a te Toihautū o Te Puni Kōkiri, a Michelle Hippolite.
I whakarewaina te Rautaki Reo Māori a te Karauna, arā, ko Maihi Karauna, e te Pirimia, e Jacinda Ardern i Te Matatini i te marama o Huitanguru. Ko te wawata nui 'Kia māhorahora te reo', arā, kia kitea, kia rangona te reo Māori i ngā wāhi katoa, i ngā mahi katoa, hei reo kōrero mā te katoa, i ia rā.
"Mai anō i te whakarewatanga o Maihi Karauna, i te mahi ngātahi mātou ki te whakawhanake mai i ngā kaupapa tuatahi. Otirā, mā pango mā whero, kua oti te mahi," te kī a Mrs Hippolite.
Hei tā te Tumuaki o Te Taura Whiri i te Reo Māori, hei tā Ngahiwi Apanui, ka tū te hui taumata ā-motu mō te reo Māori mā te hunga rangatahi i te wiki tuatahi o Hakihea i tēnei tau.
"Ko te aronga nui tuatahi, ko te hunga rangatahi. Mā ēnei kaupapa, ka piki ake te pānga o te reo Māori ki te hunga rangatahi, waihoki, ka mōhio rātou, kei a rātou tonu te mana o te reo o āpōpō. Ka mōhio hoki rātou, he mea nui te reo Māori mā rātou ā ngā tau e heke mai ana."
"Ka whai wāhi hoki ēnei kaupapa ki te maramataka mahi a te UNESCO Tau o ngā Reo Taketake 2019.”
Ā tēnei wiki tonu ka whakaputaina te Request for Proposal a Te Māngai pāho mō te kaupapa o Snap-Reo. Hei tā Larry Parr, te Tumuaki o Te Māngai Pāho, e $300,000 te nui o te pūtea e wātea ana ki tēnei kaupapa hou. He ara hou tēnei e kitea mai ai ngā hua o te hinengaro auaha mō te reo Māori.
Hei tāna, "Ka mahi ngātahi mātou o Te Māngai Pāho me Te Taura Whiri i te Reo Māori ki te taha o Whakaata Māori mō tēnei kaupapa te take. Kei te hīkaka katoa mātou ki te mahi ngātahi ki te hunga e ngākaunui ana ki te reo".
Hei ngā marama e tū mai nei, ka pānuihia e Te Puni Kōkiri me Te Māngai Pāho ngā kōrero mō ngā papamahi, mō te hui taumata ā-motu me te kaupapa o Snap-Reo. Tirohia ā rātou whārangi Facebook, ā rātou pae tukutuku mō ngā kōrero o te wā.