Mauao ki Hana Paraniko

Published on Rātū, 19 Kohitātea, 2016

Tekau-mā-rua ngā ākonga o Te Wharekura o Mauao i haere atu ki Silicon Valley, i Hana Paraniko, i raro i tētahi kaupapa e whakahau ana i ngā rangatahi ki te whai i te ara mātauranga.

Ka tūtaki ngā ākonga ki ngā rakahinonga, ki ngā kaiwaihanga, ki ngā kaiwhakahoahoa, ki ngā kaiwhakarato moni, ki ngā kaipūtaiao, ki ngā pūkenga mātauranga anō hoki ki Silicon Valley me te Whare Wānanga o Stanford i raro i tēnei kaupapa hou.

Ko te tino take o te haerenga, he whakaatu atu ki ngā ākonga i ngā hua o ngā kaupapa mātauranga o te pūtaiao, o te hangarau, o te mātauranga pūkaha me te pāngarau i te ao mahi. E kīia ana ko ngā kaupapa o STEM ēnei (he whakarāpopototanga o ngā kupu Ingarihi). Kua noho tahi ngā ākonga ki ētahi o ngā mātanga o te ao i roto i ēnei kaupapa.

Students at Stanford University Medical Centre.

Ka tae atu ngā rangatahi ki te whare o Google. He mea whakaawe rātou nā ngā āhuatanga o taua uepū matua o te ao, me te whakaaro ake, tērā te rā ka mahi rātou ki tēnei pakihi, mā rātou anō kē pea rānei e whakatū tētahi atu momo Google. Ka tūtaki hoki ki ngā tākuta mai i te Kura Hauora o Stanford rātou ko ngā kaiārahi pakihi o te Kura Pakihi o Stanford.

 

Ka mātua kite ā-kanohi ngā ākonga i ngā hua o te whai i ngā kaupapa mātauranga o STEM i ngā wāhi mahi o te ao whānui tonu.

Ka rongo anō rātou ki te hiranga o te reo me ngā tikanga Māori ki ngā tāngata o Silicon Valley. I haere atu ngā ākonga me te pātai, “He aha rā ngā akoranga mā mātou mai i Silicon Valley?” otirā, ko te pātai kē a ngā tāngata o Silicon Valley “He aha rā ngā akoranga o te ao Māori mā mātou?”

Nā te Kumikumi Trust (he whakahaere nō Tauranga Moana), nā Callaghan Innovation me te Mana Tohu Mātauranga o Aotearoa (NZQA) tēnei haerenga i utu. Kotahi wiki te roa o te haerenga.

Ko te whāinga a ngā kaiwhakahaere Māori o te kaupapa, kia eke te nui o ngā rangatahi ka whai wāhi mai ki tēnei kaupapa ki te 100 ā te tau 2016. Ko te tūmanako, hei te tau 2020, ka piki ake te tokomaha o ngā ākonga ki te 1,000.

Kei te whakapā atu a Daryn Bean, te Kaihautū Māori o te Mana Tohu Mātauranga o Aotearoa rāua ko Hemi Rolleston, te Kaihautū Māori i te Rāngai Mahi o Callaghan Innovation, ki ngā rōpū ā-iwi, ki ngā kura me ngā momo pakihi ki te kimi ake i ētahi kaitautoko mō tēnei kaupapa. Kei te mahi hoki rāua ki te taha o ngā tāngata o te Whare Wānanga o Stanford me Silicon Valley i tautoko mai i te haerenga tuatahi nei.

“I ngā rua tekau tau kua pahure, i te aro nui te ao mahi ki te rāngai pūtea me te rāngai ture. Kua eke te ao mahi moni a te Māori ki tētahi taumata e āhei ana tātou ki te tuku pūtea, ki te ārahi hoki i ngā rangatahi ki te whai mahi i te ao hangarau, i te ao pūtaiao me ngā tūmomo tūranga auaha o te ao hou.

“Ko te tūmanko mā ngā mahi a NZQA me ā mātou kaitautoko ka nui ake te tokomaha o ngā ākonga Māori ka whakawhiwhia ki ngā tohu mātauranga mō ngā kaupapa mātauranga o STEM ā ngā tau e 5—10 e heke mai ana. Me pakari hoki te tū o ngā ākonga i te ao Māori,” te kī a Daryn Bean.

“Me rite ngā pūkenga whakaoti rapanga ki ērā o MacGyver, e whai tūranga mai ai ngā rangatahi o ēnei rā ki ngā uepū o tēnei ao hurihuri hou. Me mātau rātou ki te pūtaiao, ki te pāngarau, ki te mātauranga pūkaha hoki. Ko te hunga e kaha ana ki te ū ki ā rātou mahi, ko te hunga pākiki, e māia ana ki te whakaoti rapanga, ko rātou te hunga whaimahi hei ngā ngahuru tau e haere mai ana,” te kī a Hemi Rolleston.

 

Back to top