Hēnare: ko te aroha mutunga kore

Published on Rātū, 19 Kohitātea, 2016

Kei whea mai ki ngā toi rei a te pakihi o Hēnare e hao nei i te umanga rei o Aotearoa. Ko ngā rei ā-ringa, he mea hanga ki ngā rawa o te taiao, he mea whakarākei ki te pūmahara, he taonga e minaminatia ana e te marea.

Ko Nerida Johnstone, he uri o Ngāti Porou, o Rongowhakaata, o Ngāti Kahungunu, nāna tēnei pakihi toi rei, ko Hēnare te ingoa. Kei Rotorua tana pakihi. Ko tana whāinga roa, he waihanga i ngā toi rei hou e tūhono ai, e whai mana ai te wahine, te tangata rānei i te taiao, i te ao, i te pō.

A one of a kind handmade piece from the Henare collection.

Hei tāna, “He rawe ki a au te hono i te mētara ki te pōhatu, ki te rei, ki te kōiwi, ki te kirikau rānei hei waihanga i tētahi taonga whakarei motuhake ... ko ngā rawa māori tonu, he matatini te hanga, koia nā ngā āhuatanga e kitea ana i aku mahi.”

 

Ko te Tūranga-nui-a-Kiwa tana ūkaipō, ā, i mahi a Nerida ki Toi O Tāmaki, i whakaakona ia ki te hoahoa pūeru, kātahi ka huri ki ngā toi pēnei i te ahuahu me te whakawhanake i ōna pūkenga ahuahu wākihi. Nā āna mahi auaha, ka āta kitea e ia ko tōna aronga nui ko te waihanga rei e tohu ana i te aroha mutunga kore, mā ngā rawa māori tonu, kia puta mai āna taonga rei hou.

“Kua roa ahau e aro ana ki te āhei a te rei ki te whakaohooho i te pūmahara, arā, he wā motuhake, he hokinga mahara, he hononga ki tētahi atu … Ko tēnei āheinga nui whakaharahara o te rei, ānō nei koia te pītau whakarei e kawe ana i te rongo o te pakihi o Henare.”

Ki te kōrero koe ki a Nerida, tāpiri atu ki tōna ngākau nui ki te waihanga rei ātaahua, he mea nui te hononga ki tōna whānau, otirā, ki ōna tīpuna, koia i tapaina ai tana pakihi.

“I ahu mai te ingoa Hēnare i taku koro, i a Hēnare Te Owai Mackey … ko tana akiaki, ko tana tautoko mai i a au, koia taku pou whirinaki. Ko taku pakihi he tohu aroha ki a ia.”

Kotahi tau noa iho te pakeke o tēnei pakihi, kei te hau te rongo o Hēnare - kua whakairia tāna ake paetukutuku, ā, kua whakatairangahia ki te whakaputanga o Hakihea 2015 ki te moheni o  Air New Zealand, ko KiaOra.

Ka uia a Nerida mō tētahi painga o tana whakahaere i a Hēnare, ka pēnei ana tana whakautu, “He waimarie nōku kua rata mai, kua hokohoko mai ngā kaihoko i Aotearoa, ā, tae rā anō ki Te Pīki Āporo. Heoi anō, ko ngā mihi mai i te hunga kei te mau i ngā whakakai a Hēnare, arā, ko ngā taonga nāku anō i waihanga, koia nā te painga nui ki a au.”

E kore a Nerida e wareware i te tautoko me te āheinga o tana pakihi ki te kōtuitui ki ētahi atu pakihi nā ngā mahi a Te Puni Kōkiri Māori Business Facilitation Service.

“Ko tētahi huarahi e mahitahi ai koe me te Māori Business Facilitation Service he tūhonohono i a koe ki ērā atu tāngata pēnei i a koe. Nōku te whiwhi, kua kaha tautokona ahau e tētahi hapori nō te umanga hoahoa pūeru.

Nā te Māori Business Facilitation Service te whānuitanga o ngā pūkenga kāre i a au.”

Ehara i te mahi kai paraoa noa iho te waihanga i tētahi pakihi ririki – heoi, koia kua oti i a Nerida. Ko ngā wāhanga i tino uaua, ko te whakatū i te tohu a Hēnare, ko te whakatau i te whaihua a Henare me te ū tonu ki taua whakataunga, me te whakatairanga i āna mahi ki mua tonu i te aroaro o ngā mākete hokohoko, kia hāngai tonu anō āna mahi ki ngā hiahia o te wā.

“Ko te rapu urupare mai i te mākete me te whakarite i ngā kaihoko, koia ētahi o ngā pou o te whare rei o Henare. Waihoki, nā te whanaketanga o te paetukutuku e āhei ana mātou ki te whātoro atu ki te ao nui tonu.”

Featuring kuini crowns - beautiful pieces fit for a Queen made for a Kuini.

 

He aha rā te tino painga o tēnei mahi ki a ia?

“Ko te whakataurite i te mahi me te ora, koia te mea nui ki a au. Ka mahi ahau, he mahi auaha, ā, ka whai wāhi tonu ahau ki taku whānau. Kāre tahi huarahi i kō atu i tēnā. He tino taonga tēnei oranga.”

Whātoro atu ki te paetukutuku o Henare ki http://henare.nz/ ki Pukamata rānei, ki facebook.com/henarecreative

Mō ētahi atu whakamārama mō Te Puni Kōkiri Māori Business Facilitation Service tirohia tō mātou pae tukutuku, kei tpk.govt.nz/mbfs.

 

Back to top