PĀNUI PĀPAHO | MEDIA STATEMENT

Te 4 o Whiringa-ā-nuku 2018 |4 October 2018

E whakakorikori ana i ngā tākaro tuku iho me te reo mā te hangarau

Ka whakarewaina e Te Puni Kōkiri te taupānga reo Māori tuatahi mō te tākaro o Kī-o-Rahi, arā, ko Puni Reo Kī-o-Rahi te ingoa. "He taputapu hou tēnei e mau mai ana tētahi tākaro o mua ki te ao hangarau, e rongo ai te katoa i te māmā me te ngahau o te reo o te papa tākaro," te kī a Eruera Lee-Morgan, Kaitohu Matua o Te Puni Kōkiri.

Hei tāna, "Ko Puni Reo te taupānga reo tuatahi e hāpai ana i tētahi reo taketake i te ao hākinakina. Ko te taupānga tuatahi tēnei mō tētahi momo hākinakina taketake pērā i Kī-o-Rahi."

Ka whakarewaina te taupānga ki te whakataetae ā-tau o Iwi of Origin e tū ana ki Tāmaki Makaurau hei te Rātapu. Ko te whakataetae ā-iwi nui rawa o Aotearoa tēnei. Nui atu i te 2000 ngā kaiwhakataetae ka tae atu ki te hui, e waru ngā momo hākinakina ka tākarohia e rātou.

Nō Eruera Lee-Morgan te whakaaro mō te taupānga hākinakina reo Māori i raro i te Rautaki Reo Māori a Te Puni Kōkiri ki Tāmaki Makaurau. Hei tāna, he huarahi tēnei e piki ake ai te nui o te reo Māori e kōrerohia ana e ngā whānau i ngā mahi o ia rā.

"Mā te taupānga nei, ka āhei ngā whānau ki te hāpai i te reo Māori i a rātou e tākaro ana i ngā hākinakina a ngā tūpuna me ērā o te ao hou. Kei te whakakorikorihia te reo Māori i te ao hākinakina, he ao e ngākaunuitia ana e ngāi tātou".

He mea waihanga te taupānga nā He Oranga Poutama me myReo Studios. Nā rātou anō te taupānga reo Māori mō te poitarawhiti, arā, ko Puni Reo Poitarawhiti i whakarewa ki Polyfest 2018 i Tāmaki Makaurau.

Hei tā Eru anō, "Kua aro nui mātou ki ngā hākinakina e tākarohia ana e ngā whānau. E ai ki ngā tatauranga, kua heke te nui o te hunga kōrero Māori, mā ēnei momo taputapu ka huri kē pea te ia o te tai."

Ka whakarewaina a Puni Reo Kī-o-Rahi ā te Rātapu 7 o Whiringa-ā-nuku ki Bruce Pulman Park i Papakura. He taupānga utukore tēnei e hāngai ana ki ngā pūrere o Android me IOS.

KUA MUTU

Mō ētahi atu kōrero mā te ao pāpāho, whakapā atu ki a:

Eruera Lee-Morgan
Kaitohu Matua

morge@tpk.govt.nz
027 499 5213