Te Puni Kokiri

Te reo ka pīrangitia: Māori English

Te reo ka pīrangitia: Māori English

Ko te reo Māori te reo taketake o Aotearoa-Niu Tīreni. Ko ia tētahi o ngā reo whai mana e toru o te whenua. Ko te reo te poutokomanawa o te ahurea Māori, te tuakiri hoki, ā, ko tētahi taonga tuku iho o tō tātou whenua.

Kei tēnei whārangi ētahi pārongo mō te reo Māori me ētahi hononga ki ngā rauemi.Tirohia Ā Mātou Kaupapa mō ngā pārongo e pā ana ki te mahi a Te Puni Kōkiri e ārahi ana i te Rautaki Reo Māori.

Te Hītori o Te Reo Māori

Arā noa atu ngā piki me ngā heke i te hītori o te reo Māori, mai i te tīmatanga o te rautau 1800 hei reo kōrero ā-waha anake, tae rawa ake ki waenga i te rautau 1900 i hurihia ngā reo kia puta ai te reo Ingarihi hei reo matua, whānui hoki. Ahakoa te huringa, kei te ora tonu te reo Māori, ā, mai i te ngahuru tau 1970, kua whakahaumanutia hoki.

I tīmata te aranga ake anō o te reo Māori i te ngahuru tau 1970. I taua wā torutoru noa iho ngā whānau e kōrero ana i te reo Māori, ka tino māharaharatia ka mate haere te reo hei reo kōrerorero ia rā. Nā tērā i whakatūria ai ngā kaupapa mātauranga reo Māori pērā i Te Kōhanga Reo, te Kura Kaupapa Māori me Te Ataarangi.

I te tau 1987, i whakamanatia te Ture Reo Māori hei whakanui i te reo Māori hei reo pūmau o Aotearoa-Niu Tīreni. I whakatūria hoki tētahi kaupapa e mōhiotia nei ko Te Taura Whiri i te Reo Māori e hāpai ana i te reo Māori hei reo ora, hei reo whakawhitiwhiti kōrero. Ka whakatakoto a Te Taura Whiri i te Reo Māori i ngā taumata kounga mō te reo Māori ā-tuhi, ā-waha hoki, ā, ka whakarato i te rangahau ka aratakina te kaupapa here e pā ana ki te whakatairanga, te tiaki, me te whakatipu i te reo Māori.

Mai i taua wā, kua whakawhānuitia te hāngai kia whai wāhi te ao pāho Māori, ā, nō muri mai ka hua mai te whakatūnga o Te Māngai Pāho.

Ko ētahi atu whanaketanga ko te whakatūnga o Whakaata Māori  i te tau 2003. Nō te tau 2008 ka whakarewatia tētahi hōngere Whakaata Māori tuarua, ko Te Reo, kia pūmau ki te whakapāho ki te reo Māori anake.

I te marama o Paengawhāwhā 2016, ka whakaaetia Te Pire mō te Reo Māori 2016 e te Pāremata. Mā tēnei ture e tū ai Te Mātāwai, māna hei ārahi te whakarauoratanga o te reo Māori mā ngā iwi me ngāi Māori.

Kei te reo Māori me te reo Ingarihi tēnei ture, otirā, ko te tuhinga reo Māori te kape matua. He tuatahitanga tēnei i raro i te ture o Aotearoa.

Kei raro anō i te ture nei kua whakaae te Karauna nā ā rātou kaupapa here me ā rātou mahi o mua e pā ana ki te reo Māori kua raruraru ngā whakapaparanga maha o ngā iwi me ngāi Māori.

I tū te hui tuatahi a Te Mātāwai ki Ōtaki, i a Whiringa-a-nuku, i te tau 2016.

I a Here-turi-kōkā, i te tau 2017, ka kī ngā tāngata o Rotorua ko reira tonu te tāone tuatahi i Aotearoa kua reorua i te reo Māori me te reo Pākehā.

Ngā tatauranga mō te reo Māori

E ai ki Te Kupenga, arā, ko te pūrongo mō te oranga Māori i whakaputaina e Tatauranga Aotearoa i te tau 2013, e matapaetia ana ka tata ki te 55 ōrau o ngā pākeke Māori (257,500) ka āhua āhei ki te kōrero i te reo Māori (arā, ka āhei ki te kōrero neke atu i ngā kupu torutoru noa iho, kīanga rānei ki te reo). Ka whakatauritea tēnei ki te 42 ōrau (153, 500) i te tau 2001.

Ka whakaaturia hoki e te pūrongo 50,000 (arā, 11 ōrau) o ngā pākeke Māori e matatau ana, e pai ana rānei ki te kōrero i te reo Māori; arā, ka taea e rātou te kōrero mō ngā tini kaupapa, ngā kaupapa maha rānei ki te reo Māori.

Kei te pai haere ngā waiaro o te Māori, o Tauiwi hoki, mō te reo Māori. E ai ki Te rangahautanga o ngā waiaro ki te reo Māori (arā, ko te Survey of Attitudes toward the Māori Language) i mahia mā Te Puni Kōkiri i te tau 2006, i kitea ai ka whai mana ināianei te reo Māori i roto i te pāpori Māori, ā, ka whakaaetia e te nuinga o Tauiwi i Aotearoa hoki.

Te Mātāwai

Ko Te Mātāwai tētahi whakahaere hou i whakatūria ai i raro i Te Ture mō te Reo Māori 2016 hei ārahi i te whakarauoratanga o te reo Māori mā ngā iwi me ngāi Māori.

Kua rite a Te Mātāwai kia mātāuru te rere o te tahua hou ki ngā iwi e whakarauora ana i te reo, e rere ai te reo i ōna kāinga, i tōna hapori, otirā ki tōna oranga tonutanga.   

Ngā pine #kōrero

He mea whakaputa ngā pine #kōrero e te Minita Whanaketanga Māori i te wā i whakatau ai a Rotorua he tāone reorua ia – te tuatahi i Aotearoa.

He tohu ēnei hei pine ki ērā e pīrangi ana ki te whakaatu i tā rātou tautoko i te reo Māori, ki ērā e pīrangi ana ki te kōrero Māori ki ētahi atu, ki ērā hoki e pīrangi nei kia nui ake te kōrero Māori a ētahi atu ki a rātou i roto i ō rātou nā ao o ia rā.

He pine #kōrero atu anō i tiritiria i te roanga ake o Te Wiki o te Reo Māori, i te tau 2017, me te aha, e whakaaro paitia ana.

He mea hoahoa ēnei pine nā runga i te tauira o Te Pitau a Manaia. E whakaahuatia ana tētahi ‘waha kōrero’. Kei te tauira hoki e whakaahuatia ana te tipu, te kaha me te ngangahau o te reo.

Ehara i te mea mā te pinea ki ēnei pine e tohu te taumata o te mōhio ki te reo Māori, he tohu kē ia i te manawareka o te tangata kua pinea ki te pine ki te kōrero i te reo Māori, ahakoa kāore pea ia i te matatau. E whakaatu kētia ana te ngākau pai o te tangata kua pinea ki te pine ki te reo Māori, tōna pīrangi hoki ki te tautoko, ki te whakarauora anō hoki i te reo.

I tēnei wā, kei te whakarite a Te Puni Kōkiri i tētahi pūnaha e ukiuki ake ai te whakaratonga me te tiritiringa o ngā pine hei tautoko i te rautaki o te Maihi Karauna e whakawhanaketia ana i tēnei wā. Ki te hiahia koe kia pinea koe ki tētahi o ēnei pine ā tōna wā, tēnā whakapā mai ki a mātou, mā te info@tpk.govt.nz

Te Tohu Reorua i te Reo Māori me te Reo Pākehā

He mea whakaputa te rauemi o Te Tohu Reorua i te Reo Māori me te Reo Pākehā: He kupu ārahi e kairangi ai ngā tikanga nā Te Puni Kōkiri me Te Taura Whiri i te Reo Māori hei whakamaha ake, hei whakapai ake hoki i te tohu reorua puta noa i Aotearoa.

Kī ana te pukapuka whai kupu ārahi i te tohutohu pai hei āwhina i tā ngā whakahaere pāhekoheko atu ki ngā hapori Māori me tā rātou tautoko kia nui ake te kitea o te reo Māori mā te tohu.

Te Pāhotanga o te reo Māori

Ko Te Māngai Pāho tētahi Kaupapa ā-Karauna i whakatūria hei tāpae pūtea taunaki ki te whatunga ā-motu o ngā hongere irirangi Māori,  me te whakaputa i ngā hōtaka whakaata reo Māori, hōtaka reo irirangi, kohinga pūoru hoki. Ka whakahaere hoki Te Māngai Pāho i te pūtea hangarau whakawhitiwhiti pārongo hou (arā, ko ICT Māori) ka whakatūria hei tautoko i te whanaketanga ōhanga Māori, me te reo Māori, ahurea Māori hoki mā te hangarau whakawhitiwhiti pārongo (ICT).

 

Kei Irirangi.net ngā hononga me te pārongo whakapātanga ki te whatunga hongere o ngā reo irirangi Māori e 21.

Ko Whakaata Māori te kaiwhakapāoho iwi taketake o Aotearoa-Niu Tīreni, e whakarato ana i ngā tūmomo hōtaka maha ā-rohe, ā-taiao hoki mā te hunga mātakitaki huri noa i te motu, ā-Ipurangi hoki.

Ko te hongere Te Reo tētahi ratonga tūturu 100 ōrau o te hōtaka i te reo Māori. Ka tāpaea e te hongere ngā pitopito kōrero o te wā me ngā kitenga kōrero, ngā hōtaka kōrerorero, me te ngahau ā-pitopito kōrero, tae atu ki te hākinakina me ngā hōtaka tamariki. Kei SKYTV: hongere 82 me te Freeview: hongere 24 te hongere a Te Reo.

Te mātauranga Reo Māori – whakaakoranga kōhungahunga, kura hoki

Ka whakarato tēnei pepa whakamōhio a Te Tāhuhu o te Mātauranga i ētahi pārongo anō me tētahi tirohanga whānui o te kaupapa Māori me te mātauranga rumaki reo Māori, ā, i roto i Education Counts ka whai wāhi te pārongo tatauranga mō Te Reo Māori i roto i te Mātauranga.

Ko Te Kōhanga Reo tētahi kaupapa i whakatū kōhanga reo Māori, pokapū rānei, mō te mokopuna me te whānau. I whakatūria Te Kōhanga Reo National Trust Board i te tīmatanga o te ngahuru tau 1980, ko tōna whāinga ko te tiaki i te reo, i ngā tikanga me ngā āhuatanga Māori mā te whai i te urunga o te mokopuna me te whānau ki roto i te kaupapa o Te Kōhanga Reo.

Arā ētahi atu kōwhiringa rumaki reo Māori, reo rua rānei pērā i te puna reo (arā, ko te pokapū ako, tiaki hoki) me ngā puna kōhungahunga (arā, ko ngā rōpū tākaro). Ka tāpae atu ētahi kura kōhungahunga, ētahi ratonga ako, tiaki ā-kāinga hoki i te mātauranga kōhungahunga reorua hoki. Kei tēnei wāhi Ipurangi mā ngā mātua te pārongo mō te ako kōhungahunga me ngā ratonga puna mātauranga kōhungahunga (ECE).

Ka tuku Te Tāhuhu o te Mātauranga i ngā pūtea taunaki, raihana hoki ki ngā kōhanga reo me ngā ratonga ECE katoa. Ahakoa kāore ngā puna kōhungahunga (arā, ko ngā rōpū tākaro) e whai raihana ka whakawhiwhia pea ki te tohu mana e taea ai e rātou te whai pūtea taunaki i te Kāwanatanga.

Kei te rāngai kura whakature ētahi kura e whakahaeretia hei kura kaupapa Māori, ā, e hono ana ki Te Rūnanganui o Ngā Kura Kaupapa Māori. Arā anō ētahi atu kura e hono ana ki te mana whenua (arā, he Kura Motuhake).

Kei Education Counts tētahi rārangi o ngā kura e whakaakotia ana te katoa, ētahi rānei o ō rātou ākonga ngā kaupapa marautanga ki te reo Māori mō te 51 ōrau o te wā, neke atu rānei, ā, ka kitea ngā kōrero whakapā mō aua kura mā Te Kete Ipurangi.

E hiahia ana ki te ako i te reo Māori?

Mai i te tau 1979, ka kōkiritia  i roto i te hapori Māori e Te Ataarangi te ako i te reo i rō kāinga, i runga marae hoki. He tini kaupapa ako reo Māori ōna huri noa i te motu.

He maha ngā kaupapa mātauranga matua e tāpae ana i ngā pepa me ngā akoranga reo Māori kua rēhitatia ki te Te Taura Here Tohu Mātauranga o Aotearoa. Tirohia te wāhi Ipurangi a Te Mana Tohu Mātauranga o Aotearoa (NZQA) ki reira rapu ai i tētahi kaupapa mātauranga ki tō rohe.

Tērā pea ka pīrangi koe ki te toro atu ki Te Whanake, ki Kōrero Māori rānei mō ētahi rauemi ako i te reo Māori.

Papakupu Māori ā-Ipurangi

Ko Te Aka Māori-Ingarihi, Ingarihi-Māori tētahi papakupu Māori ā-Ipurangi ka noho hei hoa mō te papakupu ā-pepa.

Ka whakatauira te papakupu o Ngata i ngā kupu matua – reo Māori mai, reo Ingarihi mai hoki i roto i te rerenga me ngā kīanga i tīkina mai i ngā horopaki whānui o nāianei, o mua rānō hoki. Ka whakamāramatia te whakamahinga me te tikanga hoki.

Kei te kimi kaiwhakawhiti reo?

Kei Te Taura Whiri i te Reo tētahi Rēhita Kaiwhakawhiti reo ā-Motu e rārangihia ana ngā ingoa o ngā tāngata kua whakawhiwhia ki te Raihana Whakamāori ā-Tuhi, Whakamāori ā-Waha hoki/rānei, i tohua i raro i te Section 15(2)c o te Ture Reo Māori 1987.

Ngā Kaupapa me ngā Pānui

Kua rārangi mai ngā kaupapa me ngā pānui ki raro iho nei.

  • Whakawhanaungatanga wānanga

    • Date: 23 December 2020 to 30 December 2021

    Te reo me ōna tikanga, our connection to our whenua, marae kawa tikanga, waiata, karakia whānau connection hapū, iwi connection.

    Read more

    • Registration required
    • Organiser: Paretai, Mau Rua whānau, however incorporating the other whanau, it becomes tō mātou whānau.
  • NGATI POROU INTER MARAE SPORTS FESTIVAL 2018 - PA WARS

    • Date: 03 January 2018

    This 1-day event is a time to celebrate family values and kinship in a fun atmosphere of friendly competition and healthy lifestyle.

    Read more

    • Open to the public, no booking required
    • Organiser: Te Runanganui o Ngati Porou
  • HIKURANGI DAWN CEREMONY

    • Date: 01 January 2018
    • Time: 4am – 9am

    This celebration provides the opportunity for Ngāti Porou and manuhiri to welcome in the new year and the first rays of Tama-Nui-Te -Ra aloft our sacred mountain - Hikurangi.

    Read more

    • Open to the public, no booking required
    • Organiser: Te Runanganui o Ngati Porou
  • Tūhonohono i ngā taonga ā-iwi

    • Date: 23 November 2017 to 24 November 2017

    Tūhonohono i ngā taonga ā-iwi explores preservation of iwi cultural heritage and development of iwi cultural centres. Kaitiaki of taonga and those who have a general interest are welcome

    Read more

    • Registration required
    • Organiser: Museum of New Zealand Te Papa Tongarewa
  • Tā Mason Durie

    Groundbreaking research on Māori urbanisation

    • Date: 16 November 2017

    A leading Māori health specialist Sir Mason Durie is praising what he is calling groundbreaking research into the impacts of urbanisation on Māori.

    Read more

Back to top