Ko te kaupapa o Oranga Marae he hāpai i te tū o ngā whare me te whakarauoratanga mai o ngā taonga tuku iho i runga i ngā marae.

 

 

Mō Oranga Marae

Ko te kaupapa o Oranga Marae he tuku āwhina, he tāpae kōrero, he tuku pūtea ki ngā marae. Ka tāpaea he kōrero, he āwhina hoki ki te whānau me te hapū hei whakapakari i te tū o te marae, hei whakatutuki anō i ā rātou whāinga. Ka whai wāhi mai ngā momo kaupapa whakatū whare me ngā kaupapa e pā ana ki te whakarauoratanga mai o ngā taonga tuku iho.

Ko tētahi whāinga matua o te kaupapa, he whakakaha i ngā mahi a ngā tīpuna hei taonga tuku iho mā ngā uri, arā, ko te whaikōrero me te karanga, ko ngā mātauranga tuku iho, ko ngā tikanga me ngā kawa a te rohe.

Kei te hāpai a Oranga Marae i ngā putanga e whai ake nei:

    he wāhi haumaru te marae e pūmau ana ki te ora, e noho ora anō ai hoki ngā iwi, ngā hapū me ngā whānau he wāhi huihui te marae, kei te piki ake te nui o ngā hui me ngā mahi hei whāngai i ngā uri ki ngā mātauranga o ngā tīpuna
  • kei te piki ake te nui o ngā kaupapa e pā ana ki te reo me ngā tikanga
  • kei te mahi ngātahi ngā whānau ki te whakapakari i te tū o te marae

E whakaratoa ana te kaupapa o Oranga Marae e Te Puni Kōkiri me Te Tari Taiwhenua. Kua ara mai tēnei kaupapa i te katinga o te Lottery Marae Heritage and Facilities Fund. Kua whakakorehia te Lottery Marae Heritage and Facilities Fund ināianei.

Te marae

Kei te marae te ihi, te wehi me te tapu o ngā mātua tīpuna, e rangona ai te reo, e taupatupatuhia ai ngā tikanga me ngā take o te ao hurihuri. He wāhi whakahirahira ki te Māori, e pūmau tonu ana ki ngā mahi a ngā mātua tīpuna, pērā, i te pōhiri, i ngā huihuinga ā-iwi me ngā tangihanga. He kōrero anō

He aha rā te kaupapa o Oranga Marae?

Nō muri mai i te tono a tētahi marae, ka whakatūria tētahi kaitohu ki te mahitahi ki te marae hei whakatutuki i ngā whāinga a Oranga Marae.

Me whakatakoto te marae tētahi Mahere Oranga Marae kia kitea ai ngā whāinga me te nui o te pūtea hei whakatutuki i ngā hiahia o te marae.

Kei te mahere te whāinga roa a te marae, te tū o te marae i tēnei wā me ngā mahi hei whakatutuki mā rātou. Ko te marae anō te mana whakahaere o tēnei kaupapa. Kei te hiahia noa iho te komiti o Oranga Marae ki te kite kua mahi ngātahi te whānau, te hapū rānei ki te whakatakoto mahere mō te oranga pūmau o tō rātou marae, waihoki, ka tautoko hoki rātou i te whakatutukinga o ngā mahi.

Ka āwhina, ka tāpae kōrero ā mātou kaitohu hei whakatutuki i te mahere. Kei konei tētahi puka hei arataki i te whakawhanaketanga o tētahi mahere mō te oranga o tō marae. Ki te hiahiatia, ka āhei ngā marae ki te tono pūtea mai i Oranga Marae hei āwhina i ngā mahi māherehere.

Ka whakamanahia te Mahere Oranga Marae e te whānau, e te hapū me ngā kaitiaki, ka āhei te marae ki te tono pūtea hei whakatutuki i ngā mahi ki runga i te mahere.

He aha rā ngā kaupapa ka tautokona e Oranga Marae?

Ka tautokona ēnei momo kaupapa e Oranga Marae:

  • ko ngā mahi māherehere mō te whanaketanga o te marae – Me whai mahere te marae, kātahi ka āhei te marae ki te tono pūtea mai i Oranga Marae. Ki te hiahiatia, ka āwhinatia te marae e te kaitohu ki te tono pūtea hei whakatakoto i te mahere. Kei te tuwhera noa ngā tono hei hāpai i tēnei take i ngā wā katoa.
  • ko ngā pūrongo hangarau me ngā pūrongo whaihuanga – Me whai pūrongo hangarau, pūrongo whaihuanga rānei hei tautoko i ētahi momo mahi whakatū hanganga ki runga i ngā marae kia mātua kitea atu te hua o te mahi. Waihoki, me mātua whakaae atu te kaunihera ā-rohe i te tuatahi ki ngā whakahoutanga nunui, me whai āwhina rānei te marae ki te kimi i te ara tika e hāpaitia ake ai ngā tikanga tuku iho a kui mā, a koro mā. Ki te hiahiatia, ka āwhinatia te marae e te kaitohu ki te tono pūtea āwhina. Ka whakamanahia te mahere oranga marae a te marae, kātahi ka āhei te marae ki te tono pūtea hei tautoko i aua mahi.
  • ko te whakaraurauoratanga mai o ngā taonga tuku iho – Ka āhei te marae ki te tono pūtea hei tautoko i ngā mahi a te Mahere Oranga Marae e whakarauoratia ai ngā mahi a kui mā, a koro mā ki runga i te marae. Kei te wātea te marae ki te tono pūtea i muri iho i te whakamanatanga o te Mahere Oranga Marae.
  • ko ngā hanganga hou – Ka āwhinatia te marae e te kaitohu ki te tono pūtea, ki te kimi āwhina rānei mō ngā hanganga hou kua tohua ki runga i te Mahere Oranga Marae. Kei te pai noa te tono pūtea mai i wāhi kē, mai i Oranga Marae hoki hei hāpai i ngā mahi. He tauwhāinga pūtea a Oranga Marae, otirā, kua tohua te nui o te pūtea hei tohatoha ki te motu whānui. Ehara i te mea ka whakaaetia te katoa o te pūtea e tonoa ana e ia marae. Me whai wāhi atu ngā rauemi ā te marae, ā ētahi atu wāhi anō ki te whakatutukinga o ngā whāinga a te mahere.

Te tīmatanga

Mēnā kei te kimi koe i te ara tika hei whakapakari i tō marae, i tō whānau, i tō hapū rānei, whakapā mai ki a mātou i te tuatahi ki te kite mēnā e āhei ana a Oranga Marae ki te āwhina i tō marae.

Waeahia tō tari ā-rohe o Te Puni Kōkiri, o Te Tari Taiwhenua rānei:

Waea utukore: 0800 824 824

Īmēra: oranga.marae@dia.govt.nz

Āhea ka tuwhera mai ngā tono pūtea mō Oranga Marae?

Kei te tuwhera te kaupapa i ngā wā katoa. Me whakapā noa ki tētahi kaitohu mō ngā pārongo, mō ētahi tāpaenga kōrero me ngā tono pūtea. Me tuku mai tō tono pūtea mā te ipurangi rānei.

Ka tukuna ngā tono pūtea mō ngā mahi māherehere, mō ngā pūrongo hangarau me ngā pūrongo whaihuanga i ia wiki. Ka puta atu te whakatau mō ngā tono pūtea ki ngā marae i roto i te toru wiki.

Ka tirohia ngā tono hei hāpai i ngā taonga tuku iho me ngā hanganga hou i ia hauwhā o te tau (arā, i ngā marama o Poutūterangi, o Pipiri, o Mahuru me Hakihea). Ka tata mai te wā, ka whakaputaina ngā rā e tū ai te hui whakatau pūtea. Ka tukuna ngā whakatau pūtea ki ngā marae i roto i te rua wiki i muri mai i te hui o te komiti.

He aha rā ngā paearu arotake mō ngā tono pūtea?

Me noho te marae i raro i tētahi o ngā karangatanga ki raro iho nei, e āhei ai te marae ki te tono pūtea:

  • he marae kāinga, arā, he marae nō ngā uri o tētahi whānau, o tētahi hapū, o tētahi iwi rānei
  • he marae tāone, arā, he mea whakatū mā ngā whānau Māori e noho ana i te tāone
  • he marae kāinga, he marae tāone rānei e tū ana i runga i te whenua kua rāhuitia mō ngā marae, kua rēhitatia hoki ki roto i te kāhiti
  • he marae kāinga, he marae tāone rānei e tū ana i runga i te whenua Pākehā, kua rēhitatia hoki ki roto i te kāhiti

Me whai mana te tūnga o te marae ki raro i te ture, me tū tētahi rōpū whakahaere, ngā whakaritenga tōtika, ngā kaupapa here me ngā tukanga e tika ana ki te tautoko i te nui me te hōhonu o tō kaupapa mahi. I mua i te tuku whakatau pūtea, ka āta whiriwhiri mātou i te hāngai o te whakahaere me te āheinga o te marae ki te whakatutuki i tō kaupapa.

Te tono āwhina

Me kuhu atu ki te pae tukutuku o te pūnaha whakahaere i ngā tono pūtea me ngā kiritaki (GCMS) a Te Tari Taiwhenua hei whakatū i tētahi pūkete kia āhei koe ki te tono pūtea. Kei raro iho nei te hononga ā-ipurangi.

Rēhitatia ki te pūnaha whakahaere tono pūtea

Mēnā kāore anō koe kia kuhu atu ki te pūnaha whakahaere i ngā tono pūtea me ngā kiritaki, me whakatū hoki koe i tētahi pūkete RealMe. I te wā tuatahi ka uru atu koe ki te pūnaha whakahaere i ngā tono pūtea me ngā kiritaki ka tonoa koe ki te rēhita ki RealMe.

E āhei ana hoki koe ki te rēhita ki RealMe ki te pae ipurangi o RealMe. Patohia ki konei mō ngā whakamārama mō RealMe

He āwhina anō mā ngā marae

Ka āwhina a Te Puni Kōkiri i ngā marae ki te kimi i ngā rauemi tōtika mai i ngā tāngata me ngā whakahaere maha i te rāngai tūmataiti me te rāngai tūmatanui.

Kua whakaemi mai ngā whakamārama ā-ipurangi me ngā rauemi hei āwhina i ngā marae ki raro i ngā kaupapa e toru. Pānuitia

 

Back to top