Te Puni Kokiri

Te reo ka pīrangitia: Māori English

Te reo ka pīrangitia: Māori English

Ko te Tira Ārahi o Te Puni Kōkiri ko te Tumuaki, a Michelle Hippolite, rātou ko ngā Tumuaki Tuarua tokowhā.

Te Tumuaki – ko Michelle Hippolite

Mai i te marama o Hakihea i te tau 2012, ko Michelle Hippolite (nō Waikato, Rongowhakaata me Te Aitanga-a-Māhaki) te Tumuaki o Te Puni Kōkiri. Mai i taua wā ka kōkiri ia i te tukanga panoni hei whakahou i ngā tikanga mahi a Te Puni Kōkiri hei whakatutuki i ngā whāinga pae tawhiti o te rōpū whakahaere.

I a Michelle ngā tūranga matua i roto i ngā tari kāwanatanga me te rāngai Kāwanatanga whānui. Ko tētahi mea whakaharahara i tōna umanga ko te ārahi i te kāwanatanga ki te whakatū i Whakaata Māori me ngā rautaki e pā ana ki te reo Māori.

I mua tonu i tōna urunga ki Te Puni Kōkiri, ko ia te Kaihautū i Te Papa Tongarewa, he mahi i kawea e ia mō ngā tau e whā neke atu.  I a ia i reira, nāna te mana kākano rua o Te Papa i hāpai, i whakawhanake hoki i ngā hononga ki te ao tae rawa ake ki ngā whakaaturanga i tū ai i Ūropi, i Amerika ki te Raki hoki, me te whakahokinga mai o te kōiwi tangata me te toi moko huri noa i te ao.

I tēnei wā ko Michelle te Heamana o Te Kura Māori o Porirua, ā, koia hoki tētahi Taratī Rāngai Kāwanatanga o te Tarati Whakaōrite Whiwhinga Mahi (arā, ko EEO – Equal Employment Opportunities Trust).

Tirohia te pānui a Michelle.

Te Tumuaki Tuarua, Whakahoatanga Kaupapa Here – ko Lil Anderson

Mai i te marama o Hereturikōkā 2015 kua hāpai a  Lil Anderson (nō Te Rarawa, nō Ngā Puhi hoki) i ngā mahi a te Tumu Whakarae Tuarua o te Rangapū Kaupapa Here ki Te Puni Kōkiri, nō muri mai i te tīmatatanga o tāna mahi hei Kaitohutohu Matua i te marama o Haratua.

Tūturu, nō Panguru i Hōkianga ia, ā, kei reira, kei te papakāinga o tō rātou whānau, ōna mātua e noho tonu ana. I kuraina ia i Kaikohe i mua i tōna hūnukutanga ki Te Whanganui-a-Tara.

Neke atu i te 25 tau te roa o te mahi a Lil, i te rāngai tūmatanui, i te rāngai kāwanatanga whānui hoki. Tae noa mai ki tēnei wā, ko te ārahitanga, ko te tiaki hononga, me te whakapai ake i ngā huanga mō ngāi Māori, me kī, ko ngā whakawhitiwhitinga kōrero mō tem ahi whakatau kerēme Tiriti tonu, ngā āhuatanga matua o tōna umanga

I mua tonu i tōna urunga ki roto i Te Puni Kōkiri, ko ia te Kaihautū Tuaruamme te Kaitohutohu Matua i Te Tari Whakatau Take e pā ana ki te Tiriti o Waitangi, i reira kawe ai ia i te haepapa mō te ārahi i ētahi whakawhitiwhitinga kōrero whakataunga Tiriti puta noa i Aotearoa. Ko tētahi āhuatanga whakahira o tāna umanga ko te whakauaua, te wero, me te hua ka puta i te whakataunga kerēme o Ngāi Tūhoe.

Atu i te mahi, he nui tonu ngā āhuatanga o tōna oranga i te taha o tōna hoa rangatira, a Alo (nō Te Aitanga-a-Māhaki,  nō Ngāti Porou hoki) rātou ko āna tamāhine tokorua, 17 tau, 19 tau hoki te pakeke, he kaitākaro hākinakina ā-hapori, ā-motu hoki rāua.

Tumuaki Tuarua, Whakahoatanga ā-Rohe – ko Di Grennell

Mai i te marama o Paenga-whāwhā i te tau 2014, ko Di Grennell (nō Ngāi Tahu, nō Ngāti Mutunga hoki) te Tumuaki Tuarua, Whakahoatanga ā-Rohe o Te Puni Kōkiri. He tūranga tēnei e tukuna ai ia ki te hāpai i tōna tino ngākaunui ki te whanaketanga ā-rohe.

I mua i tērā ko ia te Ringatohu Mahinga mō Whānau Ora mai i te marama o Whiringa-ā-Rangi o te tau 2010, he tūranga i riro i a ia i muri i tana mahi hei mema o te Taskforce on Whānau-Centred Initiatives i huaina ai te whanaketanga o Whānau Ora. Nō te 2013/2014, i ārahi ia i te mahi tirotiro i te whitinga ki te ahunga ā-pokapū kōmihana (arā, pērā i te Commissioning Agency) hei whakahaere i Whānau Ora.

E ngākaunui ana a Di ki ngā rautaki panoni pāpori, ā, he whānui tōna wheako ngaio i te taha ārai tūkino i roto i te whānau, tae rawa atu ki te mahi tahi me te kōti, te whakawhanake kaupapa, te whakangungu kaiwhakarato, me te rangahau, kaupapa here hoki. Neke atu i te rima tau te roa o tana mahi hei Ringatohu Matua o Amokura, he kaupapa horahora ā-iwi ki Te Tai Tokerau hei ārai tūkino i roto i te whānau.

He Tohu Paetahi Mātauranga Hapori (nā Te Kūnenga ki Pūrehuroa), he Tiwhikete Kaiako hoki (nā Te Kura Akoranga o Tamaki Makaurau) ā Di. Atu i tāna mahi, ka whakapau kaha ia ki āna mokopuna e tokomaha ake ana.

Te Tumuaki Tuarua, Tautoko Rōpū Whakahaere – ko Fiona McBeath

Mai i te marama o Poutūterangi o te tau 2014 ko Fiona McBeath te Tumuaki Tuarua, Tautoko Rōpū Whakahaere ki Te Puni Kōkiri.

Kua roa tana mahi i te tautoko, te kaupapa here me te whakahaere i roto i te ratonga tūmatanui, e mahi mārire ana i ngā ahumahi ahu matua. I roto i āna kawenga kua whai wāhi te tirotiro i te whakatū o te Whakahoatanga Whakatipu Ahu Matua – he kaupapa i waenga i te kāwanatanga me te ahumahi e whakangao ai ki te rangahau me te auaha hei whakanui i te tipu o te ohanga me te oranga tonu o ngā rāngai ahu matua, ono rākau, kai hoki.

I mua i te ekenga ki tōna tūranga i Te Puni Kōkiri, ko ia te Ringatohu Kaupapa Whakamahi i te Manatū Ahu Matua, i reira ia i kawe ai i te tātari pakihi, te whakangungu i te hunga mahi kanohi kitea, te matataua, me te tautoko pakihi i roto i ngā wāhanga whakahaere.

I whiwhi a Fiona i te Tohu Paerua Tāhūhū o te Whakahaere Tūmatanui i Te Whare Wānanga o Te Whanganui-a-Tara, ā, ko ia tētahi o ngā paetahi tuatahi nō te Australia New Zealand School of Government (ANZSOG) i whakatūria ai ki te whakaako i te rautaki whakahaere me te kaupapa here tiketike ki ngā kaiārahi o te rāngai tūmatanui. Kua roa ia e ngākaunui ana ki te whakaōrite whiwhinga ki te ratonga tūmatanui.

Te Tumuaki Tuarua, Rautaki me te Putanga Rōpū Whakahaere – ko Guy Beatson

I mua i tōna taenga mai ki Te Puni Kōkiri, ko Guy te Hekeretari Tuarua, Kaupapa Here Rawa Taiao, arā, ko te Natural Resources Policy, i te Manatū Mō te Taiao (MfE), i reira i ārahi ai ia i ngā panonitanga whakahaere mō te wai māori e tautokona ana e te wānanga tahitanga mō te whenua me te wai, arā, ko te Land and Water Forum, me te tukanga hei hāpai i ngā mōtika me ngā whai pānga ā-iwi e pā ana ki te wai Māori.

I roto i te Rāngai Rawa Taiao, nā Guy te whakawhanake, te whakatutuki hoki i te kaupapa here e pā ana ki te panoni taiao me te whakahaere rawa i kawe. I ārahi hoki ia i te whakapai ake i te kounga o te tohutohu me te āheinga o te Manatū.

I tīmata tā Guy umanga i te Kaitohutohu Kaupapa Rawa, arā, ko te Treasury, ā, i mahi ia i ngā tūranga tiketike mō ētahi kāwanatanga puta i te ao. Tae rawa atu tēnei ki te tūranga Hekeretari Tuarua me te kawe i te tahua moni, te whakahaere ahumoni me ngā hinonga ā-kāwanatanga i roto i te Minitatanga Ahumoni a Whītī. I te tau 2001, i tīmata te mahi a Guy i te Manatū Ōhanga, arā, ko te Ministry of Economic Development, hei Kaiōhanga Matua/Ringatohu, ā, ko te tikanga i mahi ia i te rautaki ōhanga, i te kaupapa here ahumahi me te arotakenga.  Nō muri mai i whakatūria ia e te Manatū hei Kaiārahi Ōhanga i te Kōmihana Teitei o Aotearoa i Canberra, i Ahitereiria.

I te tau 2005 i puta kōhure ai a Guy i te Whare Wānanga ā-Motu o Ahitereiria me te tohu e kīia nei ko te Australia and New Zealand School of Government Executive Master of Public Administration. He tohu paerua ōhanga hoki tā Guy nā te Whare Wānanga o Waitaha.

Back to top