Te Puni Kokiri

Te reo ka pīrangitia: Māori English

Te reo ka pīrangitia: Māori English

1840-1893

Ko tā Te Puni Kōkiri orokohanga mai hei tari kāwanatanga, nō te Tari ‘Protectorate’ (i te tau 1840-1846) i raro i te mihingare, kaiako hoki, ko George Clarke, i tū ai hei Kairuruhau Matua.   Ko te whāinga o taua tari ko te tiaki i ngā tika a te iwi Māori i pūmautia ai i raro i te Tiriti o Waitangi.   Nā tōna arotahinga atu ki te hāpai i aua tika i korengia ai te Tari ‘Protectorate’. 

Ko tōna whakatinanatanga whai muri atu (i ngā tau 1861-1893) ko te Tari ‘Native’, i whai pānga atu ki tētahi wā taumaha te tūāhuatanga o te Māori me te Pākehā, arā, i waihotia ai ki tahaki e te tini Pākehā te Tiriti o Waitangi, ā, ko te whakaaro ko te āta whakapēhi kē i te pāpori Māori.

Engari, i taua wā tonu i whakawhanakehia ai te kaupapa o ngā kura ‘native’, ā, i whakatūria ai ngā Tūru Māori i te Whare Pāremata kia taea ai te whakapuaki i te whakaaro Māori i roto i te Whare Pāremata.

1906-1989

Ko te whakatinanatanga tuatoru ko te Tari ‘Native’ i whakatūria i te tau 1906 i raro i te Minita ‘Native’, arā, ko Tā Timi Kara me tētahi aronga tīmatanga ko te whakanoho whenua me te hauora.

I ngā tau 80 whai muri mai, ka whakawhānuitia ngā mahi a te tari hei whakakotahi i ngā taitara (i te tau 1927), hei whakawhanake whenua Māori (i te tau 1929), hei whakatipu mahi (i te tau 1931), hei hāpai i te mahi a te Tarati Māori (i te tau 1932), ko ngā whare (i te tau 1959), ko te whakangungu mahi (i te tau 1959), ko te hūnuku (i te tau 1960), ko te whakahaere i ngā take me ngā kawenga o Aotearoa ki Te Moana nui a Kiwa, mō te hunga Pasifika e noho mai ana ki Aotearoa hoki (i te tau 1968 ki 1975), ko te Kōhanga Reo (i te tau 1981), ko Mana Enterprises (i te tau 1986), ko MACCESS hoki (i te tau 1987).  

I te tau 1947, ka whakaingoatia anō te tari, arā, ko te Tari Take Māori e te Pirimia Peter Fraser, ko ia hoki te Minita Take Māori, ā, nana hoki tētahi ture i whakamana hei whakauru i te kupu 'Māori' hei whakakore atu i te kupu 'Native' i roto i ngā ture. 

Ka āta tipu haere te hunga kaimahi mai i te 45 tāngata i te tau 1906 ki tōna keokeonga tata ki te 1000 tūranga tūturu huri noa i ngā rohe maha i ngā tau mutunga o te ngahuru tau 1970.

1989-

I te tau 1989 i whakakorengia te Tari Take Māori, ā, e rua anō ngā rōpū whakahaere i whakatūria, arā, ko te Manatū Māori, me Te Tira Ahu Iwi.   I te tau 1992 i whakakorengia ngā kaupapa hou e rua rā, ā, ka whakatūria Te Puni Kōkiri, hei manatū whakawhanaketanga Māori.

Mai i te tau 1840 e 29 ngā āpiha matua o Te Puni Kōkiri me ōna mātārere.  Ko Tipi Tainui Ropiha te āpiha matua Māori tuatahi i te tau 1948.

Source:   Butterworth, G. V., and H. R. Young.   Māori Affairs .   Wellington:   Iwi Transition Agency; GP Books, 1990.

Back to top