Summary sheet of the 2009 Māori Language Attitudes Survey

Te Rautaki Reo Māori

Nō te tau 2003 ka whakaputahia e te Kāwanatanga te Rautaki Reo Māori hou, hei whakapai ake i tana ruruku i āna mahi i roto i tēnei rāngai. E rima ngā whāinga o te Rautaki nei: arā, te whakapiki i te tokomaha o ngā kaikōrero i te reo Māori; te whakawhānui atu, te whakapiki atu i te whakamahinga i te reo Māori; te whakapakari ake i te mātauranga reo Māori; te whakaata i te wāhi ki ngā iwi me ngā hapū hei arataki i te whakaoranga o te reo i roto i ō rātou ake hapori; te whakapiki i te whakaaro pai me te ngākau rarata o te tangata ki te reo Māori (tirohia www. tpk.govt.nz mō ētahi atu kōrero mō te Rautaki Reo Māori).

Ko tā te tuarima o ēnei whāinga he whakapiki i te mana o te reo Māori mā te whanake i te whakaaro pai me te ngākau rarata i ngā kaikōrero i te reo me te hunga kāore i te kōrero i te reo. I roto i ngā tau tata nei, kua whakatūria ētahi kaupapa hei whakatairanga i te mana o te reo Māori, arā:

  • te whakatūranga i Whakaata Māori hei whakapāho i ngā hōtaka reo Māori, hōtaka tino kounga ki ngā tāngata katoa o Aotearoa;
  • te whakatairanga i te Wiki o te Reo Māori, e kawea ana e Te Taura Whiri i te Reo Māori;
  • te whakatūranga o te Hōtaka Tuku Mōhiotanga mō te Reo Māori, e kawea ana hoki e Te Taura Whiri i te Reo Māori, hei whakatairanga i te whakaako me te whakamahi i te reo.

He mea tino whai take kia whakahoungia te Rautaki Reo Māori i roto i te huringa o te wā, hei whakaatu mai i te āhua panoni o te reo. I tēnei wā kei te whakahaeretia ērā mahi hei arotake, hei whakahou tonu i te Rautaki Reo Māori.

Back to top