He Kura Māori mō Tō Tamaiti

Te wāhi ki ngā whānau

Mā pango, mā whero ka oti te mahi

Ina whakauru koe i tāu tamaiti ki te kura Māori, ehara i te mea ko tāu tamaiti anake ka hono ki te kura, engari, ko te whānau hoki. He wāhanga nui tō te whānau i roto i te mahi whakahaere i te kura Māori, nā reira, ka whai wāhi koe ki te tohatoha i ō pūkenga me ō mātāpono hei oranga mō te kura. mā tō hono ki te kura, ka mōhio tonu koe e pēhea ana te whanaketanga mai o tāu tamaiti.

He nui ngā ara e whai wāhi ai koe ki roto i te mahi akoako a tāu tamaiti i te kura – ahakoa i te akomanga, i te kapa haka, i te mahi i te kai o te rā nui, i te haere i ngā haerenga a te kura me ngā kaupapa, pēnei i te noho hei māngai i te poari kaitiaki o te kura.

Tērā koe te āwhina atu i ngā kaupapa pānui, tākaro, ahurea rānei; ngā haerenga me ngā hōpuni, te tū hei kaitiaki i te whare pukapuka, i ngā tamariki rānei ki runga pahi, ki runga ara hīkoi ki te kura. Kōrero atu ki te kaiako o tāu tamaiti – māna koe e whakamōhio me pēhea tō āwhina, me whakapā atu rānei koe ki a wai.

Back to top