Te Puni Kokiri

Te reo ka pīrangitia: Māori English

Te reo ka pīrangitia: Māori English

Kua whakaaro rānei koe kia noho ki runga i tētahi poari kāwanatanga?
Ko tētahi mahi a Te Puni Kōkiri he tohutohu atu ki te Kāwanatanga mō ngā tāngata e tika ana hei noho ki runga pōari kāwanatanga, komiti, rōpū tohutohu maha noa.

Ko te Rātonga Kāwanatanga, Whakaingoatanga hoki ka pupuri i tētahi pātengi raraunga o ngā tāngata e whai ana i ngā pūkenga tika, ā, ka tohutohu atu me te tuku ingoa ki ngā Minita me ngā rōpū e hiahia ana kia whakaingoa tāngata ki runga i ngā rōpū nei.

Ko wai ka taea te rēhita?

Kei te wātea ki ngā Māori katoa kia rēhita ki runga i te rārangi nei mehemea e whakaaro ana rātou kei a rātou ngā pūkenga, āhuatanga me te ngākaunui hoki kia tuku āwhina ki tētahi poari kāwanatanga, komiti, rōpū tohutohu rānei. I mua i te tuku ingoa ka whakaarohia ngā pūkenga me ngā tohu mātauranga e hiahiatia ana i runga i ngā poari e kimi tāngata ana. Ko te tikanga, kei te kimihia ngā tāngata ringa raupā, wheako nui, pūkenga nui hoki i roto i te rāngai.

Ko ngā wheako rāngai e tino hiahiatia ana ko ēnei:

  • Whakahaere pakihi, pūtea hoki
  • Mātauranga, Hauora, Whanake Kaupapa Here Hāpori
  • Pūkahatanga, whakahaere rawa, pūtaiao me te hangarau, me ētahi atu wāhanga hangarau
  • Rangahau me te matatika
  • Whakahaere rāngai tūmatanui, me te
  • Mahi whanake iwi /hāpori rānei

Ka tuku ingoa mātou ki a wai?

Tuku ingoa ai mātou ki ētahi momo rōpū kāwanatanga, tūmataiti hoki, tae noa ki ēnei e whai ake nei:

  • Ngā rōpū mō rātou kei te Minita Māori he kawenga kia tuku ingoa, tae noa ki a:
    • Whakaata Aotearoa - TVNZ
    • Te Ohu Kai Moana
    • Te Māngai Pāho
    • Te Taura Whiri i te Reo Māori
    • Te Rōpū Whakamana i te Tiriti o Waitangi
    • Rātonga Whakaata Māori
    • Te Rōpū Tiaki o Poutama
  • Ngā Hinonga Kāwanatanga
  • Nā Rōpū Rangahau o te Karauna
  • Rōpū Rāngai, hei tauira:
    • Te Rōpū Whakahaere Whakararu Taiao
  • Rōpū Kāwanatanga, hei tauira:
    • Kaporeihana Āwhina Hunga Whara, me
  • Ētahi atu rōpū tohutohu o te kāwanatanga

Pēhea te mahi:

  1. Me rēhita koe ki te Ratonga
  2. Ka pataihia ana mātou mō ētahi whakaingoatanga, ka kimi mātou i te pātengi raraunga, ka whakaturitehia ngā āhuatanga o te tūranga ki ngā pūkenga me ngā wheako o ngā tāngata i runga i te pātengi raraunga.
  3. Kātahi ka tuku mātou i ētahi ingoa ki te Minita, ki te rōpū rānei i tono mai ai ki a mātou.

Mehemea kei a koe ngā pūkenga me ngā wheako e hiahiatia ana e tētahi poari, ā, ka pai ki a koe kia whakaingoatia mō runga i tētahi rōpū whiriwhiri whakatau, tēnā koa tukuna mai tōu whakapapa whiwhimahi mā runga imera ki nominations.service@tpk.govt.nz, tukuna mai rānei mā te poutāpeta: Te Kāwanatanga me ngā Whakaingoatanga

Te Puni Kōkiri
Pouaka Poutāpeta 3943
Freepost 101505
TE WHANGANUI A TARA

Ngā Pātai e Kaha Whiua Ana

He pātengi raraunga whai mahi anō tēnei?

Kao. Aroha mai engari kāore mātou e āhei ana ki te āwhina tangata kia whiwhi mahi. Kei te kimi mātou i ngā tāngata hei noho ki runga i ngā poari kāwanatanga, komiti, rōpū tohutohu hoki.

Kātahi anō au ka whiwhi tohu. Me tuku anō rānei au i tōku ingoa?

Ngā mihi nui ki a koe mō tōu whiwhi tohu. Ko te tikanga, kei te kimi ngā rōpū i ngā tāngata wheako whānui, ringa raupā hoki. Nā reira pai ake pea kia tatari koe kia āhua kikī haere rānō tōu whakapapa whiwhimahi

Ka taea rānei te whakaingoa i tētahi atu tangata?

Mehemea e hiahia ana koe kia whakaingoa i tētahi atu tangata, tēnā koa tukuna mai o rātou mokamoka whakapānga me he paku whakamārama mō o rātou pūkenga, wheako hoki. Mā mātou anō e whakapā hāngai atu ki a rātou.

Ka tukuna rānei tōku ingoa mō ngā mea katoa?

Ka tono mai ngā rōpū mō ngā pūkenga, tohu, wheako hoki e hiahia ana rātou, ā, ka āta whakatauritehia ngā tāngata ki ngā hiahia o ia tūranga. Ka kore e tukuna aunoa tōu ingoa.

Mehemea ka tonoa ahau mō tētahi tūranga, ka taea anō e au te whakakāhore?

Ehara i te mea me whakaae koe ki tētahi whakaingoatanga mehemea ka tonoa koe.

Ka noho tapu ōku mokamoka?

Ko te pārongo e puritia ana ki runga i te pātengi raraunga, me ngā whakapapa whiwhimahi ka whakamahia mō te Rātonga Kāwanatanga/Whakaingoatanga anake hei whakaingoa tangata. Ka āta tiakina ēnei pārongo kia tapu.

Me pēhea au te titiro ki ngā pārongo e pupuri nei koutou e pā ana ki au?

Kei a koe te tika, i raro i te Ture Tūmataititanga 1993, kia titiro me te whakatika i ngā pārongo whaiaro e pupuri nei mātou mōu. Tukuna emera ki a mātou ki nominations.service@tpk.govt.nz hei whakahou i ōu mokamoka whakapapa whiwhimahi.

He aha atu anō ētahi pātengi raraunga?

Arā anō ētahi atu rātonga whakaingoa kei te whakahaerehia e ētahi tari kāwanatanga. Anei ētahi e whai ake nei:

  • Manatū Take Wahine
  • Manatu Take Pasifika
  • Te Tari Take Matatika
  • Te Tari mō Ngā Take Hauā
  • Te Rōpū Arotūruki me te Tohutohu mō ngā Kamupene Karauna

Back to top