Te Puni Kokiri

Language preference: Māori English

Language preference: Māori English

Ko Te Mātāwai tētahi whakahaere hou ka whakatūria i raro i Te Ture mō te Reo Māori hei arataki i te whakarauoratanga o te reo Māori mā ngā iwi me ngāi Māori.

13 ngā mema o Te Mātāwai

· Tokowhitu i kopoutia rā e ngā iwi

· Tokowhā i kopoutia rā e ngā whakahaere o Te Reo Tukutuku (he kaiwhaipānga ki te reo Māori)

· Tokorua i kopoutia rā e te Minita Whanaketanga Māori.

Ka tū te hui tuatahi a Te Mātāwai ā te 4 ki te 6 o Whiringa-ā-nuku.

Ngā Mema o Te Mātāwai

Ngā mema o Te Mātāwai i tana hui tuatahi i Ōtaki, i te 4 o Whiringa-ā-nuku, i te tau 2016, me te Minita Whanaketanga Māori, me Te Ururoa Flavell, kua whai hōnore, me te Toihautū o Te Puni Kōkiri, me Michelle Hippolite. Mai i te taha mauī ki te taha matau: Ko Tākuta Ruakere Hond, ko Willie Jackson, ko Te Ururoa Flavell, kua whai hōnore, ko Robin Hapi, ko Scotty Morrison, ko Tākuta Hiria Hape, ko Jeremy Tātere MacLeod, ko Tākuta Cathy Dewes, ko Pānia Papa, ko Nuki Tākao, ko Waihoroi Shortland, ko Bentham Ohia, ko Michelle Hippolite, ko Mereana Selby. E tamō ana: ko Ahorangi Rawinia Higgins.

Ngā Kopoutanga a ngā Kāhui ā-Iwi

­

Ngā Rōpū e Whai Pānga ana ki te Reo Māori – Ngā Kopoutanga a ngā Kāhui o Te Reo Tukutuku

Ngā Kopoutanga a te Minita

Ngā Haurongo o ngā Mema o Te Mātāwai

Ngā Kopoutanga a ngā Kāhui ā-Iwi

Te Tai Tokerau – Waihoroi Shortland (nō Ngāti Hine me Te Aupōuri)

He kaituhi, he ringatohu, he kaihautū hōtaka, he kaiwhakaari hoki a Waihoroi Shortland kua neke atu i te 30 tau e mahi ana i ngā mahi pāpāho e hāngai ana ki te reo Māori. I te tīmatanga o tōna ao whai mahi, he Karaka, he Kaiwhakawhiti Reo ā-Waha hoki ia i Te Kooti Whenua Māori ki Te Tai Tokerau, he Āpiha Māori i te Hapori hoki ia ki Tāmakimakaurau, ki Pukekohe me Kaitaia. Mai i reira, ka huri ia ki te mahi hei kaipūrongo matua ki Te Karere me Mana Māori Media. Ko tētahi o ana tūranga ā-kiriata ko te kaiwhakaari matua i Te Tangata Whai Rawa o Weneti nā reira i whakawhiwhia ai ia ki te tohu mō te Kaiwhakaari Pai Katoa i te Hui Whakawhiwhi Tohu mō ngā Kiriata ki Aotearoa. Ko ia tētahi o te kāhui whakaari o te whakamāoritanga o tā Rūrūtao whakaari, o Toroihi rāua ko Kāhira i tū rā ki Te Whare Tapere o te Ao ki Rānana. He Kaikōmihana a Waihoroi i Te Taura Whiri i te Reo Māori, ā, i tēnei wā he mema ia nō te Poari o Te Ratonga Whakaata Māori.

Tainui - Pānia Papa (nō Ngāti Korokī-Kahukura, nō Ngāti Mahuta hoki)

Inā kē te whānui o ngā wheako o Pānia Papa i roto i te mātauranga me te pāpāho - katoa e aro nui ana ki te reo Māori me te whanaketanga Māori. He pūkenga whakaako o mua ia i Te Whare Wānanga o Waikato, ā, kua noho ia hei kaitohutohu ki ngā pokapū mātauranga maha. I āna mahi i te ao pāpāho, ka whai wāhi atu te waihanga me te whakataki hōtaka, te whakawhiti reo ā-tuhi mā te pouaka whakaata, tae atu ki te whakawhitihanga o ētahi pakiwaituhi e rongonui ana i te ao, ki te reo Māori. I te tau 2011, ko ia tētahi o ngā mema o te rōpū motuhake i arotake rā i te Rautaki Reo Māori a te Karauna, ā, ko ia tētahi o te Rōpū Whakaū i te Kounga o te Reo Māori e mātai ana i te whakamāoritanga o Te Ture mō Te Reo Māori. I tēnei wā, ko Pānia tētahi o ngā mema o te Rōpū Tohutohu mō te Reo ki Waikato-Tainui e whai nei ki te whakatinana i te rautaki reo a ngā iwi o Waikato-Tainui. I te tau 2015, ko ia tētahi mema o te rōpū tohutohu nāna nei i arotake te rautaki reo a te iwi o Raukawa, ā, i te tau 2014, ko ia tētahi mema o te rōpū tohutohu i arotake rā i te rautaki reo a te iwi o Ngāti Kahungunu. He tumuaki ia nō Takatū Associates Limited e arotahi ana ki ngā auahatanga o te reo Māori i te ao o te mātauranga me te pāpāho; ā, he Kaituruki ia i Te Panekiretanga o te Reo, i tētahi whakahaere i whai wāhi atu ai ia hei tauira i te rangapū tuatahi, i te tau 2004, ā, e tū nei hei kaiwhakaako ināianei.

Mātaatua - Bentham Ōhia (nō Ngāi Te Rangi, nō Ngāti Pūkenga, nō Ngāti Ranginui, nō Ngāti Te Roro o Te Rangi, nō Te Ati Awa, nō Ngāti Rārua me Ngāi Tahu)

E hia nei ngā tau i whai wāhi atu ai a Bentham Ohia ki a Te Wānanga o Aotearoa (TWoA), otirā, e whitu ngā tau i noho ai ia hei Pouhere (i te tau 2006 ki te tau 2013). Nōna i Te Wānanga o Aotearoa ka whai wāhi atu ia ki te whanaketanga o ngā hōtaka mō te ahurea, mō te mātauranga, mō te reo me te tuakiri Māori. Ko Bentham te tumuaki o te whakahaere e pā ana ki te kaiārahitanga e kīia nei ko te Advancement of Māori Opportunity, ā, e ārahi tonu ana ia, e tautoko tonu ana ia i te tokomaha o te hunga kua puta ō rātou ihu i te hōtaka, e tū nei i ngā tūranga kaiārahi ināianei. Ko ia hoki te kaihautū tuarua i te Waikato-Tainui College of Research and Development, ā, he kaitiaki ia i te Tarati o Ngā Pōtiki i Pāpāmoa, ki Tauranga.

Te Arawa - Tākuta Cathy Dewes (nō Ngāti Rangitihi, nō Te Arawa, nō Ngāti Porou hoki)

He tāiki ngāpara a Tākuta Cathy Dewes ki te tautoko i te reo Māori, ā, kua neke atu i te 40 tau te roa o te āta kuhu i ngā tini kaupapa whakarauora i te reo Māori. Ko Cathy te wahine tuatahi ki te noho i te Rōpū Kaitiaki Māori o Te Arawa, ā, i whai wāhi atu ia ki te whakatairangatanga kia tika te whakataunga kokoraho ki a Ngāti Rangitihi i te Whakataunga Ngātahitanga o te Kokoraho i ngā Ngahere o te Puku o te Ika a Māui. Kua noho hoki ia hei kaiurungi i Te Ratonga Whakaata Māori, ā, ko ia te kaihautū o Te Reo Irirangi o Te Arawa i tēnei wā. Ko Cathy tētahi o te rōpū nāna nei i tū ai te Rā o te Reo Māori i te tau 1975, i huri rā hei Wiki mō te Reo Māori. Ko ia tētahi o ngā tāngata matua i te whakatūnga o ngā kura kaupapa Māori puta noa i Aotearoa, ā, ko ia te tumuaki o Te Kura Kaupapa Māori o Ruamata ki Rotorua, o tētahi o ngā kura kaupapa Māori Aho Matua tuatahi, ka mutu, ko ia hoki te Tumuaki o Te Rūnanga o ngā Kura Kaupapa Māori, o te rangatōpū ā-motu mō ngā kura kaupapa Māori. Kua whai wāhi atu ia ki te whakatūnga me te whakaakoranga o ētahi kura whakangungu i te hunga e takatū ana ki te mahi hei kaiwhakaako i te Kura Kaupapa Māori.

Te Tai Rāwhiti - Jeremy Tātere MacLeod (nō Ngāti Kahungunu, nō Te Arawa, nō Ngāti Raukawa te au ki te Tonga, nō Rangitāne, nō Ngāti Kuia, nō Ngāi Tahu, nō Te Ati Awa, nō Waikato, nō Ngāti Maniapoto, nō Taranaki hoki)

E mōhiotia ana a Jeremy Tātere MacLeod hei toa matua i te whakarauoratanga o te reo Māori i roto o Ngāti Kahungunu, ā, e tautokona ana ia e ōna kaumātua i ngā tūranga maha ōna i waenga i te rohe, ā, i te motu whānui hoki. He ika a Whiro a Jeremy nō Te Panekiretanga o Te Reo, ā, kua whakawhiwhia hoki ia ki te Tohu Paerua i te Mātauranga Aronui (i raro i te kaupapa Māori) ki te Taumata Hiranga ā-Hōnore, ka mutu, kua whakaurua ia ki te hōtaka whai i te tohu kairangi. He pia hoki ia nō Te Mata Punenga, he rōpū whāiti tēnei e whakangungua ana kia tū hei tohunga karakia kia kumanutia ai ēnei pūkenga i waenga i te whakatipuranga e whai ake nei. Kei te Kaporeihana o Ngāti Kahungunu Iwi a Jeremy e mahi ana, ā, ko tāna he whakatinana i te Rautaki Whakarauora i te Reo Māori o Ngāti Kahungunu – o Kahungunu, kia eke! Horahia ai hoki e Jeremy ana whakaaro mō ngā tikanga me ōna tohungatanga i te reo Māori, inā hoki e ārahi ana ia i tētahi kaupapa rangahau nui e aro ana ki te tautuhinga me te penapenatanga o ngā momo mita ā-iwi motuhake. He tohungatanga hoki ōna e pā ana ki te whakarauora reo me te whakamahere e pā ana ki te reo, nā runga i ōna anō wheako hei ākonga reo tuarua, i ōna manako hoki kia matatau ia ki te reo.

Te Tai Hau-ā-uru – Dr Ruakere Hond (nō Taranaki, nō Ngāti Ruanui, nō Te Ati Awa, nō Te Whānau-a-Apanui hoki)

Kua neke atu i te toru tekau tau a Tākuta Ruakere Hond e tino kaha nei ki te whai wāhi atu ki te mātauranga mō ngā pakeke i roto i te hapori, ki ngā kura tuatoru hoki, otirā, ki ngā kaupapa whakaako i te reo Māori mā te rumaki, ki te whakawhanake hapori anō hoki. Ko ia te Kaiwhakangungu i te Whakawhanake Ngaio ki Te Rūnanga o Te Ataarangi, he mea whakawhiwhi ia ki te takuhe rangahau whakamaumahara ki a Hohua Tutengaehe, ā, ko ia hoki tētahi kaiwhakahaere hōtaka i ngā Kura Whakarauora - he kaupapa whakangungu mō te whakamahere i te reo. Ko ētahi o ōna tūranga o mua he kaiwhakahaere Kaupapa o te Tarati o Te Reo o Taranaki, he Tumuaki hoki mō te Tari Māori i Te Whāre Wānanga o Awanuiārangi. I tēnei wā, ko Ruakere te Kaihautū o Te Rūnanga o Te Ataarangi, ā, he mema ia i te kaunihera o Te Kura Matatini o Taranaki, ā, e kaha ana tana whai wāhi atu ki ngā kaupapa whakawhanake ki Parihaka. He nui tonu ngā tūranga ā-mana hautū i tūria ai e Ruakere, pēnei i Te Taura Whiri i te Reo Māori, ā, kua whai wāhi tonu atu ia ki te maha o ngā kaupapa reo ā-hapori i te rohe, i te motu whānui hoki.

Te Waipounamu - Nuki Tākao (nō Te Ati Awa, nō Ngāti Rārua, nō Ngāti Tama, nō Ngāti Toa Rangatira, nō Ngāti Mutunga, nō Ngāi Tahu, nō Ngāi Tūhoe hoki)

Ko Nuki Tākao tētahi e ngākaunui ana ki te whakatinana i te whakarauoratanga o te reo Māori, ā, nā ōna wheako i te kura kaupapa Māori, i te whakawhanaketanga o te reo i roto i te whānau, i te hapū, i te iwi hoki, i te rangahau me te tā tuhinga anō hoki, e hōhonu nei ōna mōhiotanga ki ngā momo uauatanga ahurei e pā ana ki te whakarauora i te reo Māori. Ko ia tētahi Tumuaki o Māreikura Ltd e mahi tahi ana me ngā kura, me ngā whakahaere tā tuhinga, me ngā whakahaere ā-kāwanatanga, ā-iwi hoki ki te tuku i te whānuitanga o ngā ratonga e whai wāhi atu nei te tā tuhinga, te tohutohu, te tautoko, te kauhau, me te ārahitanga ā-mātauranga nei. Ka whai wāhi atu ki āna mahi o nāianei ko te Wānanga Reo, ko te Tā Tuhinga ki te Reo Māori me Te Aho Tātairangi (He kaupapa whakangungu tāngata ki te whakaako i ngā Kura Kaupapa Māori).

Ngā Rōpū e Whai Pānga ana ki te Reo Māori – Ngā Kopoutanga a ngā Kāhui o Te Reo Tukutuku

Te Mātauranga – Mereana Selby (nō Ngāti Raukawa, nō Ngāti Huia, nō Ngāti Porou hoki)

I ngā tau e 40 kua hipa ake nei, e kaha ana te whai wāhi atu o Mereana Selby ki te kaupapa o te whakarauora i te reo Māori, otirā, i waenganui tonu i tōna ake iwi o Ngāti Raukawa. E tino ngākaunui ana ia ki te kaupapa o te whakarauora reo me te tukunga o te reo i waenga i ngā whakatipuranga. I tīmata te huarahi mahi e takahia nei e Mereana ki te kura tuarua hei kaiwhakaako i te reo Māori me te Mātauranga Hākinakina. Mai i reira ka whai tūranga ia i ngā mahi whakangungu kaiwhakaako reorua ki te Kura o te Mātauranga ki Te Whanganui-a-Tara. Nō te paunga o ngā tau e whā i reira ka uru atu ia ki Te Wānanga o Raukawa hei Kaihautū i te tari o te Whakaakoranga, te tari māna e hāpai te whakaakoranga o ngā hōtaka whakangungu kaiwhakaako ki te reo Māori. I taua wā, ka tutuki hoki i a ia tōna Tohu Paerua i te Mātauranga Māori. I te tau 2007 ka kopoua a Mereana ki te tūranga o te Tumuaki ki Te Wānanga o Raukawa. Ko ia te wahine tuatahi i kopoua ai hei Tumu Whakarae ki tētahi wānanga, ā, kua eke ki te tekau tau te roa o tana mahi ki reira. Ko ia te Kaihautū o Te Tauihu o Ngā Wānanga - te tōpūtanga o ngā wānanga e toru.

Te Pāpāho – Scotty Morrison (nō Ngāti Whakaue)

He kaiwhakataki a Scotty Morrison i ngā hōtaka e pā ana ki ngā take Māori o te wā, i Te Karere me Marae. He mea whakawhiwhi ia ki te Pōkairua Whakaako, ki te Tohu Paetahi i te Mātauranga me te Tohu Paerua (i te Mātauranga) e Te Whare Wānanga o Waikato, ā, i tū ia hei Ahorangi Āpiti i te Reo me ngā Tikanga Māori ki Te Whare Wānanga o Wairaka ki Tāmakimakaurau. I mahi hoki ia hei Tumuaki mō te Tari ki te Kura Māori o Te Whare Wānanga o Wairaka. E whakaoti ana ia i tana Tohu Kairangi e pā ana ki te Whakarauoratanga o te Reo. Kua tū ia i ngā tūranga hei kaitohutohu e pā ana ki te reo Māori ki te maha o ngā whakahaere, ā, nāna i waihanga, nāna hoki i whakatinana te rautaki whakarauora i te reo o Ngāti Whakaue. Ko ia te kaituhi o te pukapuka e kīia nei ko 'The Raupo Phrasebook of Modern Māori', me 'Māori Made Easy – For everyday learners of the Māori Language' – he pukapuka e kīnakihia nei ki te kupu me te ataata kei te paetukutuku o MāoriLanguage.net.

Te hapori – Tākuta Hiria Hape (nō Tūhoe, nō Te Whakatōhea hoki)

I tēnei wā, he Pouwhakahaere a Tākuta Hiria Hape mō ngā Hononga Māori, ā, ko ia tētahi o te Rōpū Kaiārahi Mātāmua ki Te Puni Kōkiri, i raro i te maru o te tari o te Minita Whanaketanga Māori. I tōna tūranga, ka tautoko ia i te Pirīmia me te Kāwana Tianara i roto i ngā take e pā ana ki ngā tikanga Māori, ā, ka tautoko hoki ia i te Minita mō ngā Whakataunga Kokoraho Tiriti, i te Minita Whanaketanga Māori, otirā, i te Minita mō Whānau Ora. I mua i tana tūranga o nāianei ki Te Puni Kōkiri, he Kaiwhakahaere Mātāmua a Hiria i te Wāhanga mō Te Tirohanga ā-Tikanga Māori nei, i raro i te tari Kāwanatanga. Nō te tau 1999 he kaiwhakahaere whakarae ia i Te Mana Whakahaere Mātauranga ki Tūhoe, ā, ko ia hoki te kaitohutohu e pā ana ki ngā tikanga i roto i a Ngāti Tūmatauenga. Ko ia te Tumuaki o te Tari Māori i te Kuratini ki Te Whanganui-a-Tara mai i te tau 1991 ki te tau 1998, ā, he Pūkenga Matua hoki ia. I tutuki i a ia tōna Tohu Paerua i te Mātauranga i Te Whare Wānanga o Wikitōria ki Te Whanganui-a-Tara, ka mutu, ko tana tuhinga roa, e kīia nei ko 'Māori Learning Styles', te tuatahi o te Tari Mātauranga i tuhia katoatia ai ki te reo Māori. I tutuki i a ia tāna tuhinga mō te Tohu Kairangi i Te Whare Wānanga o Awanuiārangi i te tau 2015, ā, koinei hoki tā Awanuiārangi tuatahi o ngā Tohu Kairangi i tuhia katoatia ai ki te reo Māori.

Te hunga noho tāone – Willie Jackson

Ko Willie Jackson te tumu whakarae o te Manukau Urban Māori Authority, te Kaihautū o Te Whakaruruhau o ngā Reo Irirangi Māori, ā, ko ia hoki te kaihautū o te National Urban Māori Authority. Ko ia te kaiārahi o te Rōpū Tōrangapū mō te Mana Motuhake – o te rōpū tōrangapū Māori tuatahi i roto i te Kāwanatanga, ā, ko ia hoki te kaiārahi tuarua o te rōpū tōrangapū, o Alliance. I mua i te kuhu ki te whare pāremata, kua roa a Willie e tū ana hei kaimahi i te uniana, hei kaipāpāho kōrero hākinakina, hei pou whakarae i ngā mahi waihanga puoro Māori, hei kaiwhakawhiti kōrero hoki mā te Urban Māori Authority. Ināianei, he kaipāho ia e whakawhiwhia ana ki ngā momo tohu whakanui, he kaituku whakaaro mō ngā take tōrangapū, ā, he kaiwhakataki ia i ngā whakawhitinga kōrero i te Reo Irirangi o Wātea (i te hōtaka o Paakiwaha), i Radio Live hoki.

Ngā Kopoutanga a te Minita

Ahorangi Rawinia Higgins (nō Tūhoe)

Ko Ahorangi Rawinia Higgins te Tumu Ahurei ki Te Whare Wānanga o Te Ūpoko o te Ika a Māui. Nō mai anō i te tau 2009, e mahi ana ia ki te whare wānanga, ā, i mua i te kopoutanga ōna hei Tumu Ahurei i te marama o Pipiri, i te tau 2016, ko ia tonu te Tumuaki o Te Kawa a Māui me te Iho Rangahau Māori. Ka kīia whānuitia a Rawinia he mātanga mō te whakarauoratia o te reo Māori, ka mutu, e hia kē nei ngā tūranga poari, ngā rōpū tohutohu, ngā rōpū kōkiri kaupapa anō hoki kua tūria e ia. Nāna i hautū mā Te Minita Whanaketanga Māori te Rōpū Tohutohu mō te Reo Māori hei whakaawe, hei auaha hoki i Te Ture mō Te Reo Māori 2016 me te whakatūnga o Te Mātāwai. He mema ia nō te rōpū kōkiri i tā Te Kotahitanga o ngā Iwi Rautaki Reo Māori 2014. I tēnei wā, ko ia tētahi o ngā mema o te poari o Ngā Pae o Te Māramatanga me Te Rōpū Whakamana i Te Tiriti o Waitangi. I mua i te kopoutanga ōna ki a Te Mātāwai, ko ia tētahi o ngā mema o te poari o Te Māngai Pāho, he Kaikōmihana hoki ia i Te Taura Whiri i te Reo Māori.

Robin Hapi

Inā kē te whānui o ngā wheako ā-mana hautū, ā-mana whakahaere matua hoki o Robin Hapi i ngā momo whakahaere huhua, kāwanatanga mai, tūmataiti mai, hapori mai hoki. I tū ia hei Tumu Whakarae i Aotearoa Fisheries Ltd mō ngā tau e toru, ā, ko ia hoki te Tumu Whakarae i Te Ohu Kaimoana mō ngā tau 13. I tēnei wā, ko ia Te Amokapua o Te Mana Whakahaere o Te Wānanga-o-Raukawa, he mema hoki nō te Poari o Callaghan Innovation, o Te Pou Matakana, o te Pokapū Kōmihana mō Whānau Ora ki Te Ika a Māui, o Te Mata o Aotearoa hoki. I te tau 2016 i whakawhiwhia ia ki Te Tohu Tāpui mō ana mahi mō te iwi Māori, mō te hapori me te mana hautūtanga. He Tautōhito ia i Te Rōpū Tumuaki, he Mema hoki nō Te Rōpū Kaiwhakahaere o Aotearoa.

 

Back to top