Te whakarite i tō tamaiti mō te uru atu ki te kura

Te whakarite i tō tamaiti mō te uru atu ki te kura kia eke au ki ōku taumata

I ētahi wa, he āhuatanga tino hou ki ngā tamariki te tīmatanga ki te kura – me ngā whānau. Anei ētahi tīwhiri kia pai te tīmatanga o tāu tamaiti ki te kura:

• kōrero ki tāu tamaiti mō te kura e toru marama pea i mua i tōna rā tīmata ki reira – whakahihiritia a ia ki tēnei wāhanga hou o tōna ao
• kōrero ki a ia mō ngā tamariki e mōhio ana ia kua tīmata kē atu ki te kura – mēnā kāore ia i te mōhio ki ētahi atu tamariki i te kura, mea atu ki a ia ko te kura tētahi wāhi tino pai mō te tūtaki hoa hou
• me āta tohu te kura ki tāu tamaiti, ina pahure i a kōrua mā runga waka, mā raro rānei – whakahaua ia kia whakaaro nōna te kura
• haria tāu tamaiti ki te kura i ngā rangi whakatā, ā muri rānei i te kōhanga reo hei tirotiro – tukuna ia kia tākaro ki te wāhi tākaro, kia titiro ki roto i ngā matapihi ki ngā pikitia i ngā pātū me te mahi a ngā tamariki
• mēnā e mōhio kē ana tāu tamaiti ki ētahi o ngā tamariki o te kura, whakaarohia kia pōwhiritia ētahi o rātou ki tō kāinga takaro ai, kia whai hoa ia
• me mōhio tāu tamaiti ki te kawe i a ia anō ki te wharepaku, ki te tango me te whakamau hoki i ōna hū, kāore he āwhina
• me whakapā wawe atu ki te kura o tō rohe kia waia ai koe ki ana hōtaka me ōna hiahia.

“Kua whakaae māua ko taku hoa kia whakatipu i ā māua tamāhine me te reo Māori, i te mea, ko rāua tonu tērā. I haere rāua ki te kōhanga reo, nā reira, he mea tika kia haere rāua ki te kura Māori. Engari, e mōhio ana māua me kōrero Māori hoki māua i te kāinga. I mua i te haere a Korihimihiata ki te kura, i whakaritea kia kōrero Māori anake mātou katoa mai i te 6pm–8pm i ia pō. E ono marama ia i te kura i nāianei, kua tae tonu mai tana pūrongo tuatahi. E tipu ake ana tōna kaha ki te kōrero Māori, ā, kei te harikoa katoa mātou ki tōna whanaketanga.” Danessa Hill