Te Whakamahi i te Reo

E ai ki ngā rangahau o te ao whānui e pā ana ki te whakaoratanga o te reo, e ora tonu ai ngā reo itinga pērā i te reo Māori, me tuku iho taua reo mai i tētahi whakatipuranga ki tētahi anō.

Kei te noho toipoto ngā kaikōrero Māori, ā, kāore i te taurite te tohatoha puta noa i te taupori Māori. Toru tekau ōrau o ngā kāinga Māori ki Tāmaki-Makau-rau, kotahi te kaikōrero, neke atu rānei. Kei roto i te āhua haurua o ēnei kāinga kotahi anake te kaikōrero, nā reira he whāiti noa ngā mea angitū kia kōrerohia te reo Māori ki ēnei kāinga.

Rua tekau mā whā ōrau o ngā tamariki e noho ana ki ngā kāinga kei roto nei he kaikōrero pakeke kotahi, neke atu rānei. nā reira ka taea te tuku iho te reo Māori mai i tētahi whakatipuranga ki tētahi atu.

Mō ngā tāngata whai pūkenga reo Māori, kua piki te whakamahinga o te reo ki te kāinga mai te tau 2001, tae ake anō ki ngā whitinga kōrero i waenga i ngā pakeke Māori me a rātou tamariki. Hei tauira: Ko ngā whitinga kōrero i waenga i ngā pakeke me a rātou kōhungahunga kua piki mai i 57% i te tau 2001 ki 76% i te tau 2006; Ko ngā whitinga kōrero i waenga i ngā pakeke me a rātou tamariki kura tuatahi kua piki mai i 53% i te tau 2001 ki 64% i te tau 2006; Kua piki hoki ngā whitinga kōrero i waenga i ngā pakeke me a rātou tamariki kura tuarua mai i 37% i te tau 2001 ki 61% i te tau 2006.⁴ He tohu pai tēnei mō te takanga i te tuku iho o te reo mai i tētahi whakatipuranga ki tētahi atu. engari kāore anō ngā tauira whitinga kōrero i te kāinga kia eke ki te taumata e taea ai te kï ko te reo Māori te reo whitinga kōrero tuatahi.

Mō te taha o te reo ki roto i te hapori, ka kaha rangona ki roto i ngā “rohe” tikanga ā-iwi Māori, pērā i ngā hui, kei runga marae rānei. Ko te reo Māori ehara i te reo whitinga kōrero tuatahi o ia rangi i ērā atu o ngā rohe hapori.

Māori Language Competencies by Age

Source: Census 2006.

⁴ Ko ēnei ōrau ka whakakotahi i te ōrau o ngā pakeke Māori i whakamahi i te reo Māori hei reo whitinga kōrero me te ōrau o ngā pakeke Māori i whakamahi i te reo Māori i roto i ngā whitinga kōrero i ētahi wā.