Kei roto i tēnei whārangi he rāpopotonga o ngā kitenga matua o te pūrongo “Te Oranga o te Reo Māori ki Te Taitokerau 2006” (te Patapātai).¹

Ka whakamahi tēnei pūrongo i ētahi momo rangahau whānui hei tuku whakaahua hiato o te reo Māori kei tēnei rohe. Ko ētahi o aua rangahau ko ngā raraunga tataunga taupori; ngā raraunga mai i te Patapātai; tataunga mātauranga, kitenga mai i ngā rangahau ā-motu, me ētahi pārongo mai i ngā kaiwhakatakoto kaupapa reo me ētahi māngai hapori e mahi nei ki Te Taitokerau. Mō te roanga atu o te pūrongo me toro atu ki www.tpk.govt.nz.

Te Mōhio me te Matatau ki te Reo Māori

E ai ki te Tataunga Taupori 2006, he 32% o ngā pakeke Māori 27,900 ki Te Taitokerau e mōhio ana ki te reo Māori.

Ko Te Taitokerau te rohe tuarua, i roto i ngā rohe e waru o te Patapātai, mō te rahi o te ōrau o ngā tāngata e mōhio ana ki te reo. E whakaatu ana te Patapātai he maha ake ngā tāngata e marama ana ki te reo (46%) tērā i ngā tāngata e kōrero ana i te reo (29%).²

He kaha nui ngā rerekētanga i roto i te ōwehenga o ngā kaikōrero i te reo Māori mehemea ka tirohia te pakeke o te tangata. Mō te hunga kei raro iho i te 55 tau te pakeke, ko te ōrau “kōrero” he 25%. Engari mō te hunga 55 tau te pakeke, neke atu rānei, he 51% kē te ōrau.

Heoi, ko te tokomaha o rātou neke atu i te 55 tau, he paku mehemea ka whakatauritehia ki te tokokmaha o rātou kei raro iho i te 55 tau. Ka mutu, he matatau ake te reo o te hunga 55 neke atu, tērā i te hunga taipakeke.

Mai i te tau 2001 kua kitea ētahi nekehanga paku noa ki roto i te matatau o ngā kaikōrero o te taupori Māori o tēnei rohe. Hei tauira: kua piki haere te matatau kōrero mai i 29% i te tau 2001 ki 32% i te tau 2006. Ko te matatau whakarongo kua paku heke iho mai i 47% i te tau 2001 ki 46% i te tau 2006.³

Rima tekau mā tahi ōrau o ngā pakeke Māori kei te wenewene mō tō rātou taumata matatau ki te reo Māori, ā, kei te pirangi tonu kia whakapiki i o rātou taumata pūkenga reo.

¹ Mō tēnei pūrongo kei roto i Te Taitokerau ko te rohe o Te Raki, tae noa ki Whāngarei me ngā Kaunihera o Whāngarei me Kaipara.
² Mō te roanga atu o ngā raraunga me titiro ki te pūrongo matua.
³ Kei waenga i ngā pakeke Māori he āhua pai te reo, he pai te reo, he tino pai rānei te reo.