Kei te whakaterea e Whakaata Māori he teihana tuarua ā te 2008.

Hei tā Parekura Horomia, te Minita mō ngā take Māori, ko te reo Māori anake ka whakapāhotia e te teihana hou, ka tīmata mai i ngā haora 7.30pm ki te 10.30pm. Ka tukuna atu mā te ara Freeview.

I kī te Minita Māori ko te tikanga o te teihana tuarua, kia ea ngā wawata o te hunga matatau ki te kōrero i te reo Māori me te hunga anō hoki e ako ana.

“He teihana tuarua mō te reo Māori anake i ngā wā toitū otirā hei tautoko i ngā whāinga o te Mahere Rautaki o Te Reo Māori ki te whakapiki ake i te reo me te whakamahi i te reo Māori i te kāinga,” tā Parekura Horomia.

>Ngā tohu matua o te teihana hou:

• Ka whakapāhotia mō ngā haora e toru ia rā, e whitu ngā rā i te wiki, i ngā hāora toitū mai i te 7.30pm ki te 10.30pm. Mā te wā ka piki ake ngā haora whakapāho.
• 100 ōrau kei roto i te reo Māori.
• Whakataeranga – kore.
• He wāhanga o te wātaka kei te wātea ki ngā iwi mō ā rātou ake hōtaka tuku kōrero whakamārama. Ko te tikanga o tēnei kia whakapāhotia te mita o te reo o ngā iwi katoa me te kawe i ngā huihuinga ā iwi.
• 90 ōrau ngā hōtaka o te wātaka nō te hau kāinga.
• 30 ki te 45 ōrau ngā hōtaka hou o te wātaka.
• Ko ngā hōtaka hou mā te hunga pakeke, matatau hoki ki te reo.
• Ko ngā hōtaka hou katoa ka whakakupu-haurarotia hei whakaatu maa te teihana matua.
• Ka whakamāoritia ngā pakipūmeka o te ao, me ngā pakipūmeka o te wā kāinga.

Ko te tikanga ka whakaterea te teihana tuarua a Whakaata Māori ā te hauwhā o te tau 2008. Kāore anō kia whakaingoahia.