He aha i whai wāhi ai Te Puni Kōkiri ki ngā pūtea mai i te Kāwanatanga mā ngā Wātene Māori Wardens?

Nā te Kāwanatanga tonu i tohutohu mā te Te Puni Kōkiri ngā pūtea e whakahaere mō tēnei wā, ā, tae rā anō ki te wā e whakaturia ai tētahi poari hou hei whakahaere i ngā Wātene Māori.

Kei te wātea tētahi akoranga karo aituā waka?

Kāore i tēnei wā. Mēnā e whakaaro ana koe he akoranga pai tēnei, ā, me whakauru hoki ki te Kaupapa Wātene Māori, me kōrero ki tō Kaiwhakarite ā-Rohe, māna tēnei take e whai atu.

Ka taea ngā akoranga te whakahaere ki ngā rohe?

Āe.

Kāore e taea ngā akoranga e au i ngā rā o te wiki mahi. Ka taea ngā akoranga te whakahaere i ngā mutunga wiki?

Āe. Heoi, mā te tokomaha o ngā tāngata e tohu mehemea ka whakahaeretia ngā akoranga i ngā mutunga wiki.

He akoranga anō mā te rangatahi?

Kāhore. Engari ka taea te tono pūtea mai i te Kaupapa Wātene Māori hei whakahaere akoranga e hāngai ana ki ngā hiahia o te rangatahi. Tirohia te puka whakamārama mō ētahi kōrero.

Ka taea te whakapau i ngā moni ki ngā utu whakahaere ā-tari, ā-pūtea kaute, me te whakahaeretanga o tā mātou rōpū iti?

Mehemea kei te utu koe i tētahi tangata hei kawe i ēnei mahi, kāore e taea. Heoi, ka taea te tono pūtea hei hoko taputapu hei āwhina i te taha whakahaere tari, pūtea kaute hoki. Ka taea hoki tēnei pūtea te whakapau ki tētahi hui whakamahere rautaki (e pā ana ki ngā whakahaeretanga) mō tō rōpū iti.

Kua hē ōku kākahu mō taku tinana, ā, kāore anō ētahi atu wātene kia whiwhi i ngā kākahu katoa. Ka taea e te Kaupapa Wātene Māori te utu hū hou, kākahu hoki?

Mā te whakatutuki i ngā hiahia o Te Akoranga Pirihīmana, kātahi koe ka whiwhi kākahu tika mai i te Kaupapa Wātene Māori.

Ka taea te hoko waka mā te Kaupapa Wātene Māori?

Kāo. Engari, kei ngā rōpū, kei tēnā rohe, kei tēnā rohe ētahi waka e wātea ana. Ka tiakina ngā waka e ngā Kaiwhakarite ā-Rohe, tae atu hoki ki ngā tikanga whakahaere mō aua waka. Kei ia waka anō tētahi kete haumaru, ā, he tikanga anō hei whakahaere i aua kete. Me whakapā atu ki tō Kaiwhakarite ā-Rohe mō tēnei take.

Kua tono noa atu kia whakahoutia taku whakamanatanga. Kua ahatia taku tono?

Waea atu ki 0800 991 882 kia mōhio mēnā kua tae atu te tono ki Te Puni Kōkiri.

Last modified: 12/06/2012