He tekau mā tahi ngā tamatāne nō te kaupapa ako kāmura e kīa nei Ngā Kanohi Marae i te Wairārapa i āwhina ki te whakatūwhera i te marae o Pāhiatua. I te 18 o Hōngongoi i tēnei tau ka tukuna ngā karakia whakatūwhera i tēnei marae. Kua toru tekau tau ngā kaumātua o Rangitāne me Ngāti Kahungunu e moemoeā ana ki te whakatū i tētahi marae mō te hapori whānui o Pāhiatua. Nā te mahi tahi a Te Puni Kōkiri me te komiti o te Marae o Pāhiatua ka pūāwai te wawata ki te whakaruruhau i ngā iwi o te rohe.